Саяхан Латин бүжгийн дэлхийн аварга шалгаруулах тэмцээн болж өнгөрсөн билээ. Уг тэмцээнд Монгол улсаас хоёр баг оролцсон бөгөөд "Moon dance" хамтлаг хүрэл медаль хүртсэн бол "Star dance" хамтлаг дөрөвдүгээр байр эзэлсэн юм.
Гэвч "Moon dance" бүжгийн хамтлагийн бүжигчин О.Эрдэнэ-Очир, цахим хуудсандаа "Нээрээ энэ жил манайхаас гадна бас нэг Монгол баг амжилттай оролцсон юм байна. Сая л мэдлээ, баяр хүргэе" хэмээн бичсэн нь олон хүний эгдүүцлийг төрүүлж, улмаар "Star dance" хамтлаг өөрийн цахим хуудсаараа дамжуулан уучлал гуйхыг шаарджээ. Уг мэдэгдэлд,
"Дээрэлхэлт дэлгэрэх ёсгүй.
Бүжгийн спортын талбарт гаргаж буй амжилт бүрийн ард олон жилийн хөдөлмөр, хөлс хүч байдаг. Гэвч сүүлийн үед сошиал орчинд гарч буй зарим үйлдэл нь спортын тамирчин хүнд байх ёстой хамгийн наад захын хүндэтгэл, ёс зүйн хэм хэмжээг зөрчиж байгаад харамсаж байна.
Дэлхийн аваргын тэмцээнд 13 жилийн турш нэг салбарт, нэг замаар хамт зүтгэсэн атлаа үр дүнгээ зарлахад нь зэрэгцэн зогсож байсан хамт олноо "Одоо л мэдлээ" хэмээн үгүйсгэх нь зүгээр нэг андуурал биш юм. Энэ бол бусдын хөдөлмөрийг үнэгүйдүүлж, сэтгэл зүйгээр нь дарамталж буй дээрэлхэлтийн тодорхой илрэл мөн гэж үзэж байна.
Иймд дараах асуудлуудыг хөндөн тавих болно:
1.Дэлхийн спортын хорооны Ёс зүйн хороонд энэхүү зүй бус зан авирын талаар албан ёсны гомдол гаргах.
2. Монголын бүжгийн спортын холбооны тэргүүлэгчидийн хурлаар тамирчны ёс зүй, нэгнээ хүндэтгэх соёлын асуудлыг тусгайлан авч хэлэлцүүлэх.
Монголчууд бид эвтэй байхдаа хүчтэй. Өөрийнх нь адил эх орныхоо нэрийг гаргах гэж тэмцэж буй залуу тамирчдын урам зоригийг мохоох, тэднийг олон нийтийн өмнө үгүйсгэх замаар өөрийгөө өндөрт гаргах гэсэн оролдлогыг цаашид хүлцэн тэвчихгүй бөгөөд хүлээн зөвшөөрөхгүй гэдгээ албан ёсоор мэдэгдье.
Спорт бол хүндэтгэл дээр оршдог.
Дэлхий дахинд виз хүртэл гарахын тулд 5 жилийн сошиал хүмүүжлийг авч үздэг болсон.
Erdenee Ochirkhuu та албан ёсоор уучлал гуйна уу" гэжээ.
