Ховд аймгийн Мянгад сумын нутаг дахь Халзан бүрэгтэйн холимог металлын ордод олборлолт хийхийг эсэргүүцэн нутгийн иргэд тэмцэж байгаа.
2022 онд Үндэсний аюулгүй байдлын зөвлөлийн ажлын хэсэг Халзан бүрэгтэйд ажиллах үеэр Цөмийн энергийн комиссоос хийгдсэн хэмжилтийн дүнгээр тус нутагт цацраг идэвхт бодисын хэмжээ байх ёстой түвшнээс найм дахин их байгааг тогтоосон байна. Энэхүү өндөр түвшний цацраг нь байгаль орчинд сөргөөр нөлөөлөхөөс гадна хүн, амьтан, жигүүртэн шувууд, ус, намгархаг газрын экосистемд аюул учруулах ноцтой асуудал хэмээн судалгаа гаргасан юм.
Иймд “Халзан бүрэгтэйг хамгаалцгаая” түр хорооноос өнөөдөр хэвлэлийн бага хурал хийж, дараах шаардлагуудыг Засгийн газарт хүргүүлж буйгаа мэдэгдлээ.
1. Уул уурхай, хүнд үйлдвэрийн сайд Ц.Туваан Халзан бүрэгтэйд ирж нөхцөл байдалтай биечлэн танилцах.
2. Монгол Улсын Ерөнхий сайд Л.Оюун-Эрдэнэ “Иргэд хүсэхгүй бол олборлолт явуулахгүй”гэсэн амлалтаа хэрэгжүүлэх.
Байгаль орчин болон нутгийн ард иргэд, малд аюултай сөрөг нөлөө үзүүлж болзошгүй тус ордыг ухаж, ашиглахыг нутгийн иргэд 2012 оноос хойш эсэргүүцэж хуулийн хүрээнд тэмцэж өнөөдрийг хүрсэн. Тэд хэн нэгний үгэнд автаж биш байгалийн экосистем алдагдах учир эсэргүүцэж байгаагаа мөн тэмцлийнхээ явцад хүчирхийлэл гаргаагүй, хэн нэгэн бэртэж гэмтээгүй бүгд хуулийн хүрээнд явж буйг онцолсон.
Мөн арваннэгдүгээр сарын 02-нд улс даяар тэмдэглэсэн Монгол бахархлын өдрөөр Ховд аймгийн төвд иргэд тайван жагсаал хийж 12 мянган иргэн олборлолт хийхийг эсэргүүцэж буйгаа илэрхийлэн гарын үсэг зуржээ. Тэд гарын үсэг бүхий эсэргүүцлийн бичгээ өнөөдөр Монгол Улсын Ерөнхий сайдад хүргүүлж, УИХ-ын сонгуулийн үеэр нутгийн иргэдийн саналыг үндэслэн тус ордыг ашиглах эсэхээ шийднэ хэмээн ярьж байсан амлалтаа биелүүлэхийг шаардаж байна.
