Хурд рок хамтлаг нь анх 1987 онд Төмөр замын вагон депогийн ажлын хэсэг залуусын дуу хөгжим сонирхогчдын хэмжээнд байгууллагдаж, рок бүтээлээ туурвиж эхэлсэн юм. Хурд хамтлаг 1991–1993 онд шинээр бичигдсэн “Хар салхи” бүрэн хэмжээний концертоо 1995 оны 4 сард Улсын циркт амжилттай тоглосноор, Монголын хөгжиж буй “РОК” урлагийн түүхэнд цоо шинэ хуудас нээж, шинэлэг хэв маягийг нутагшуулж, Монголын ард түмний байнгын сонсголд хүрлээ.
1998 онд Монголд анх удаа “UNPLUGGED”, 2001 онд сонгодог оркестр хөгжимтэй хамтран “Симфони Хурд” концертыг болон нийтдээ Улаанбаатар хотод 60 гаруй удаа нийтийн тоглолт хийсэн байна. Эдгээр тоглолтуудын үр дүнд 2005 онд Монгол улсын нийслэл Улаанбаатар хотын “Соёлын элч”, “Гавьяат тоглогч” хэмээх хүндэт цолыг улсаас анх удаа бий болгож шагналд хүртээв. 1999 оноос хойш АНУ, Хятад, ӨМӨЗО, ОХУ, Солонгос, Япон, Англи, Ирланд, Швед, Герман, Швейцар, Франц, Бельги, Чех, Унгар, Австри, Польш, Казахстан зэрэг дэлхийн 20 гаруй улсад тоглолтоо амжилттай хийж, дэлхийн Монгол туургатнуудын оюуны болон урлагийн хэрэгцээг ханган хүргэхэд үнэтэй хувь нэмэр оруулж, монгол туургатнуудыг хөгжмийн урлагаар нэгтгэхэд үнэтэй хувь нэмэр оруулжээ.
Хурд хамтлаг нь өдгөө сандаа 250 гаруй дуу 120 орчим дууны клиптэй бөгөөд Монголын рок урлагийн түүхэнд анх удаа “Алтан пянз”-аар нэрлэгдсэн цомог буюу шилмэл бүтээлийн сонголт, 18 CD, 2 DVD-г гарган олны хүртээл болгожээ. Монголын “РОК” урлагийн түүхэнд хийсэн гавьяаг үнэлэн Монгол Улсын Ерөнхийлөгчийн зарлигаар 2023 онд “Хурд” хамтлагийн гишүүдэд Төрийн соёрхол хүртээжээ.
“Хурд хамтлаг” сэдэвт блок марк нь хамтлагийн гишүүд болон логог дүрсээр нь харуулсан бөгөөд хамтлагийн гишүүдийн зураг, материалаар ханган зураачаар Б.Хосбаяр хамтран ажиллаж тус маркийг бүтээжээ.
