Олон улсын шүүгч, гавьяат дасгалжуулагч Ц.Сэрээтэр Монгол Улсын аварга шалгаруулах тэмцээнийг сүүлийн удаа шүүлээ. Энэ нь гавьяат дасгалжуулагч Ж.Даваажавын нэрэмжит чөлөөт бөхийн насанд хүрэгчдийн тэмцээний эргэн тойронд болсон онцлох үйл явдлын нэг болов. Учир нь Олон улсын шүүгч, гавьяат дасгалжуулагч Ц.Сэрээтэр шүүгчийн замналаа албан ёсоор өндөрлүүлж, сүүлийн удаа дэвжээн дээр шүгэл үлээв. Түүний сүүлийн шүүлт эрэгтэйчүүдийн 57кг жингийн аваргын төлөөх барилдаан байв.
39 жил шүүгч хийсэн тэрбээр энэ хугацаанд УАШТ-ийг тасралтгүй дэнсэлжээ. Тэрбээр их спортын алтан дэвжээндээ хүндэтгэл үзүүлж, олон улсын шүүгч Э.Батнасанд халаагаа өглөө. Энэ үеэр Монголын чөлөөт бөхийн холбоо, мэргэжил нэгт шүүгчид, тамирчид, дасгалжуулагчид түүнд хүндэтгэл үзүүллээ.
Гавьяат дасгалжуулагч Ц.Сэрээтэр 2008 оны Бээжингийн зуны олимпын наадамд Үндэсний шигшээ багийн дасгалжуулагчаар оролцож байсан юм. Тэрээр 2011 онд олимпын зэрэглэлтэй шүүгч болж, 2012 оны Лондоны зуны олимпын наадмын шүүгчээр ажиллаж байв. Аав О.Цэрэндагва нь мөн гавьяат дасгалжуулагч, олон улсын шүүгч бөгөөд 1964, 1968, 1972, 1976 оны олимпод дасгалжуулагч, шүүгчээр оролцож байсан түүхтэй. Ийнхүү аав хүү хоёр олимпын дэвжээнд шүүгч хийсэн түүх дэлхийд ховорхон билээ.
