УИХ-ын гишүүн Б.Энхбаяр "Нүүрсчид намайг хөөхгүй. Би нүүрсчдийг эх орноосоо хөөнө" хэмээн хэвлэлд өгсөн яриаг үндэслэн УИХ-ын гишүүн Монгол улсын үндсэн хуулийг зөрчсөн, өргөсөн тангаргаасаа няцсан болохын тогтоож өгнө үү хэмээн Үндсэн хуулийн цэцэд ханджээ. Тус өргөдөлд,
Монгол Улсын Их хурлын гишүүн Б.Энхбаяр нь Төрийн ордонд сэтгүүлчдэд мэдээлэл өгөхдөө “... би нүүрсчдэд хөөгдөхгүй, харин нүүрсчдийг эх орноос нь хөөнө ...” гэж мэдэгдсэн нь Монгол Улсын Үндсэн хуулийн Аравдугаар зүйлийн 1 болон 2 дахь хэсэг , Арван тавдугаар зүйлийн 2 дахь хэсэг, Арван зургадугаар зүйлийн 18 дахь хэсгийг тус тус зөрчсөн гэж үзэж байна. Тодруулбал:
Монгол Улсын бүх иргэн нь Монгол Улсын Үндсэн хуулийн 16 дугаар зүйлийн 18 дахь хэсэгт зааснаар “гадаадад явах, оршин суух, эх орондоо буцаж ирэх эрхтэй” ба уг эрхийг Монгол Улсын Их хурлын гишүүн нь эдлүүлэхгүй байх, улмаар эх орноосоо хөөхөөр мэдэгдсэн нь Үндсэн хуульт ёсонд халдсан үйлдэл гэж үзэж байна.
Цэц нь Үндсэн хуулийг зөрчсөн тухай маргааныг иргэдийн мэдээллийн дагуу өөрийн санаачилгаар хянан шийдвэрлэх ба ингэхдээ Монгол Улсын Их Хурлын гишүүн Үндсэн хууль зөрчсөн эсэхийг хянаж, дүгнэлт гаргах онцгой бүрэн эрхтэй билээ.
Цэцэд хандаж буй бидний хувьд энэхүү мэдээлэлдээ Үндсэн хуулийн ямар заалтыг хэн, хэдийд, ямар байдлаар зөрчсөн тухай тодорхой дурьдлаа. Бидний зүгээс Монгол Улсын Их хурлын гишүүний хэлсэн үг, хийсэн үйлдэл нь Үндсэн хуульд бүрнээ нийцдэг байх, тангарагаа зөрчдөггүй байх учиртай гэж үзэж байна. Гэвч Улсын Их хурлын гишүүн Б.Энхбаяр нь нийгэмд үүссэн тодорхой нэг асуудлаар, тухайлсан нэг, эсхүл хэд хэдэн хүнийг нүүрсний гэж нэрлэсэн тодорхой бус хэрэгт холбоо хамааралтай гэх ойлголтыг нийгэмд өгөх замаар тэдгээр этгээдүүдийг “эх орноос нь хөөнө, эх орноосоо хөөнө” гэж мэдэгдсэн нь Улсын Их хурлын гишүүний хувьд зөвшөөрч эс болох үйлдэл гэж үзэж байна.
Монгол Улсын Их хурлын гишүүн нь Монгол Улсын Үндсэн хуулийг дээдлэн сахихаа тангаргалснаар бүрэн эрх нь хэрэгжиж эхэлдэг тул Улсын Их Хурлын гишүүн Б.Энхбаярын хэлсэн үг, хийсэн үйлдэл нь Монгол Улсын Үндсэн хуулийг зөрчсөн, өргөсөн тангаргаасаа няцсан болохыг тогтоож өгнө үү" гэжээ.
