МАН-ын дарга Л.Оюун-Эрдэнэ тамгаа өгөхөө мэдэгдсэнээр намын дүрмийн дагуу Бага хурлаараа шинэ даргаа сонгох боломжтой боллоо. Гэхдээ намын дүрмийн дагуу Бага хурлын ирцэнд бүртгүүлсэн 425 гишүүний 3/2-ын буюу 283 гишүүний саналыг авч чадсан нэр дэвшигч МАН-ын даргаар шууд сонгогдох боломж бүрдэнэ. Харин чадаагүй тохиолдолд Их хуралд эрх нь шилжинэ. Энэ тохиолдолд МАН доторх асуудал улам хурцдаж жинхэнэ утгаараа төрийн зодоон, нийгмийн асуудал болохыг үгүйсгэх аргагүй юм. Хэдхэн хоногийн өмнө Б.Энхбаяр ба Д.Амарбаясгалан нарын сөхсөн асуудалд намын гишүүд нь ихэд нухацтай хандаж буйг эх сурвалж мэдээлж байна. Өнөөдрийн Бага хуралд үг хэлэхээр бүртгүүлсэн 242 гишүүний дийлэнх нь ХЗДХ-ийн сайд асан Б.Энхбаярт шүүмжлэлтэй хандах байр суурьтай байгаа юм. Намыг хагаралдуулах, эв нэгдлийг бусниулах эхлэлийг тавьсан гэж үзэж буй бололтой. Одоогоор гишүүдийн ерөнхий уур амьсгал, байр суурь нь намын эв нэгдлийг хангах, хувь хүнийхээ хувьд манлайлж чадах, нийт гишүүддээ хүлээн зөвшөөрөгдөж чадах хүнийг дэмжинэ гэсэн ерөнхий байр суурьтай байна. Магадгүй 242 гишүүн болон нэр дэвшигч Д.Амарбаясгалан, Г.Занданшатар нарыг үгээ хэлсний дараа сонголтоо хийж нэг талдаа шийдвэрээ гаргах болов уу. Ямартай ч Л.Оюун-Эрдэнэ намын тамгаа хүлээлгэн өгөхөө мэдэгдсэнээр МАН-ын даргын асуудлыг 11-12 дугаар сар хүртэл сунжруулж, бужигнуулахгүйгээр эвэнд нь хурдан оруулж цэгцрүүлэх боломжийг бүрдүүллээ. Харин Бага хурлын гишүүд нь өнгө, мөнгөнд хуурталгүй , урваж шарвалгүй сонголтоо хийж 3/2 буюу 283-аас дээш гишүүн нэг талдаа сонголтоо хийж чадвал төрийн зодоон, нийгмийн асуудал болсон МАН-ын даргын асуудалд маргааш гэхэд цэг тавих боломж байна.
