Хот сууринг энгийн нүдээр харахад зам, гүүр, өндөр барилга нь нүдэнд тусдаг. Харин амин чухал сүлжээ болох инженерийн дэд бүтэц, тэр дундаа газар доорх хот гэгддэг шугам хоолой, ус зайлуулах сувгийг тэр бүр анзаардаггүй. Улаанбаатар хотын замын сүлжээний нийт урт 2025 оны есдүгээр сарын байдлаар 1262.1 км гэсэн судалгаа бий. Үүний ердөө 23.6 хувь нь буюу 292.3 км нь л борооны ус зайлуулах сувагтай гэж мэргэжлийн байгууллагаас мэдээлдэг.
Гэхдээ үүний чамгүй хувийг сүүлийн хоёр жилд Х.Нямбаатарын баг хийсэн байдаг. Тодруулбал НЗДТГ-аас 2024 онд Улаанбаатар хотын ус ихээр тогтдог 15 байршилд 27.3 км авто замын борооны ус зайлуулах шугам угсарсан тухай Геодези, усны барилга байгууламжийн газрын тайланд дурджээ.
Түүнчлэн үерийн уснаас хамгаалах шаардлагатай гол байршлуудад шинээр 1.8 км үерийн далан барьж, иргэдийн эд хөрөнгө, амь насыг болзошгүй аюулаас сэргийлсэн байна. Мөн өмнөх онд авто замын борооны ус зайлуулах 225 шүүрт худаг, 57 үзлэгийн худгийг шинээр барьж ашиглалтад оруулж, 655 шүүрт худгийг засварлаж нөхсөн байна.
Тэгвэл энэ онд 15 байршилд 16.3 км урт борооны ус зайлуулах шугам хоолой шинээр угсарчээ. Тодруулбал Энхтайваны гүүр тал, “Алтай” хотхоны автобусны буудал, Төмөр замын төв вокзал орчим, 16 дугаар сургууль орчим зэрэг ус ихээр тогтдог байршлуудад борооны ус зайлуулах шугам угсарч, ая тухтай зорчих боломж бүрдүүлжээ.
Харин сүүлийн жилүүдэд хийсэн судалгаандаа түшиглэн ирэх онд нийт 30 км урт борооны ус зайлуулах шугам угсрахаар төлөвлөсөн байна. Ингэж чадвал борооны ус авто зам дээр тунарч, зорчиход хүндрэл үүсдэг асуудал шийдэгдэх аж.
Ташрамд дурдахад Улаанбаатар хотын борооны ус зайлуулах системийн дийлэнхийг 1970-1980 онд угсарсан байдаг бөгөөд 70 гаруй хувь нь насжилт нь хэтэрсэн гэдэг дүгнэлт гарчээ. Гэсэн хэдий өнгөрсөн жилүүдэд шугамыг засварлах, өргөтгөх чиглэлд дорвитой анхаараагүй. Харин ч Улаанбаатар хот хоёр дахин томорч, тэлсэн байдаг. Тиймээс шинээр шугам угсрахаас гадна, сэргээн засварлах ажлуудыг ч мөн ирэх жилийн төлөвлөгөөндөө тусгасан байна
