Tomy Gum-ийн этгээд зураг “Хөөрхөн хорлон сүйтгэгч”

         Чөлөөт уран бүтээлч Tomy Gum хэлэхдээ “Би энэ бүтээлийг  өнгөрсөн 11 сард хүнд хэцүү үедээ өөрийн зурсан зурагнаасаа санаа авсан. Өмнөх жил нь  би жирэмсэн болж, хүүхдээ тээж чадахгүй байсан болохоор үр хөндүүлсэн. Би тэр үед мэдээж маш их гунигтай байсан. Харин тэр сэтгэлзүйн гутрал, уналтаас гарахын тулд хийсэн зүйлүүдийн нэг нь энэ. Миний дотор байх хоёр өөр сэтгэлзүйн байдлыг энэ хоёр дүр илэрхийлж байгаа.  Би тогтворгүй, шийдэмгий бус байдалтай байсан тул зүүн талын дүр нь уйлж, шаналж байна. Харин баруун талын дүрээр итгэл найдвар тээж байгааг илтгэн харуулахыг хүссэн. Тэр илүү хүчтэй учраас нөгөөгийнхөө нулимсыг арчина.

         Миний өмнөх цуврал бүтээлүүд илүү цоглог, гэгээлэг, чин сэтгэлээсээ байсан. Гэхдээ дараа нь амьдрал үзэж, олноос тасарч, хүнд хэцүүг өөрийн биеэр туулж, мэдэрч, сэтгэлзүйн  уналтаа зохицуулах нь намайг илүү харанхуй, ил тод, зоригтой ажил хийхэд хүргэсэн. Би үзэгчдэд өөрийн  туулж өнгөрүүлсэн бие махбодийн зовлонт туршлагынхаа мэдрэмжийг өгөхийг хүссэн юм. Би улаан өнгө гаргахын тулд гель ашигласан бөгөөд хар, цагаан өнгийг зэрэгцүүлэн байрлуулж энэхүү зөрүүтэй дүр төрхийг бий болгосон. Би Кейптаун дахь Мзонке Малони, Лубабало Нкобо гэсэн хоёр дизайнертай хамтран өнгөрсөн жил таалал төгссөн аавдаа хүндэтгэл үзүүлэх үүднээс энэ костюмаа хийлгэж байсан. Аав маань харизматик, дэгжин бизнесмэн байсан бөгөөд костюм өмсөх дуртай байсан. Энд байгаа хувцаснуудыг задалж, хагаслан эвлүүлсэн нь намайг өөрийгөө хэрхэн дахин нэгтгэхийг оролдож байсныг илтгэх юм.

          Үслэг ханцуй, мууран чихний малгай (milliner Crystal Birch-ийн бүтээсэн), сарвуу,  муурны баримал гээд  эдгээр элементүүд үр хөндүүлэлт хийлгээд удаагүй байхад миний авсан муурын зулзагыг төлөөлнө. Бид түүнд "Дизель" гэж нэр өгсөн. Зураг дээр байгаа зүүн талын дүр нь таван хуруугаа дэлгэсэн бөгөөд зулзага ирэхэд түүний нас, ойролцоогоор таван долоо хоногтой, мөн үр хөндөлтийг таван долоо хоногийн дараа хийсэн болохыг харуулна.  Муурын баримал нь энх тайван, цэвэр ариун байдлыг дуудаж илэрхийлж, баруун талын дүр нь зүүн талдаа өгч, азгүй хүнд аз хийморь шилжүүлж өгч байгаа юм.

         Миний хамтрагч жирэмсний талаар мэддэг байсан бөгөөд намайг маш их дэмждэг байсан ч би түүнд мэдэрч байгаа зүйлийнхээ талаар ярихыг хүссэнгүй. Би хар муурныхаа зургийг хүмүүстэй байнга хуваалцаж байснаараа өөрийн нууцаа бусдад бага багаар дэлгэж байсан гэж боддог. Гэхдээ тэр үйл явдлаас жилийн дараа "Дизель" явчихсан. Тэр яагаад миний амьдралд анх орсон юм бол гэсэн ойлголт надад үлдсэн. Магадгүй тэр миний төрүүлж чадах байсан хүүхдийг орлож байсан. Хэрэв тэр яваагүй бол би туулж байгаа зүйлийнхээ үнэнтэй нүүр тулахгүй байсан байх.Түүний явсан нь надад ирсэн шигээ их тус болсон.

        Би одоо хамаагүй дээр илүү хүчтэй байна. Би хайртай хүмүүстэйгээ ярилцсан. Ярилцах нь  тийм ч хялбар байгаагүй. Бусад хүмүүс, гэр бүл маань юу гэж бодох бол, тэднээс айж эмээх нь миний нууцаа ганцаар хадгалж чандлан хадгалж байсан шалтгаан. Гэхдээ ярилцсаны дараа энэ бол дан ганц надад тохиолдсон зүйл биш байсныг мэдсэн. Гэхдээ ийм сэдвээр ярих нь хор хөнөөлтэй , муухай зүйл биш харин үүнийг орь ганцаараа туулж, нууж,  хадгалж байсан нь хамгийн хор хөнөөлтэй зүйл байсан.

         Энэ зураг нь ярилцах, хуваалцах нь хичнээн чухал болохыг сануулж байна. Охид, эмэгтэйчүүдэд үр хөндөлт хэр зэрэг хүнд хэцүү байдгийг хэлж, миний үзэж туулсан шиг хүнд хэцүү байдалд орохгүй байхыг анхааруулах хэрэгтэй гэж би боддог. Энэ зүйл бол таны биеэрээ мэдрэх өвдөлтөөс илүү сэтгэл, оюун санааг чинь хүчтэй өвтгөх болно. Хааяа энэ тухай бодож, сэтгэлээр унадаг ч хэн нэгэнд ярьж, хуваалцах үед түүгээр дамжуулан илүү хүчтэй болдог.

Эх сурвалж: The Guardian