Арваннэгдүгээр сарын 28-ны 08:00 цагийн байдлаар Хан-Уул дүүргийн хэмжээнд зам талбайн цэвэрлэгээний 12 байгууллагын ажилтан, албан хаагч жижүүрлэн хонож, шөнө хөдөлгөөн татарсан үед авто замын цас, мөсийг түрэх, хусах ажлыг хийж гүйцэтгэсэн аж.
Үүрийн 05:00 цагаас эхлэн туслах замуудад давс бодис цацах, явган зам талбайн цэвэрлэгээний ажлыг үргэлжлүүлэн хийж байгаа аж. Нийт 6.5 тонн давс, 30 тонн бодис авто зам дээр цацаж, 1323 тонн давс, 691 тонн бодисын үлдэгдэл нөөцтэй байгаа тухайгаа НЗДТГ-аас мэдээллээ.
Хамгийн сүүлд Хан-Уул дүүргийн худалдан авах ажиллагааны албанаас 557 саяар Бодис авах тухай тендерийг 10 дугаар сарын 04-ны өдөр зарлаж, 10 дугаар сарын 24-нд үр дүн нь гарсан байна. Улмаар СНСС ХХК 557 сая төгрөгийн санал хүргүүлж шалгарсан байна.
Уг компанийн тухайд эмчилгээний гоо засал, дотрын үзлэг, оношилгоо, эмчилгээний чиглэлтэй үйл ажиллагаа явуулдаг хэмээн opendata-д /2014-06-30/-нд бүртгүүлжээ.
