Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогчоор ажиллаж байсан Т.Даваадалайг албан тушаалаа урвуулан ашиглаж, хамаарал бүхий хүмүүстээ 5.2 тэрбум төгрөгийн давуу байдал бий болгосон гэх хэрэгт прокуророос яллах дүгнэлт үйлдэж, шүүхэд шилжүүлжээ.
Т.Даваадалай нь 2024-2025 онд төрсөн дүү болох “Нэгдсэн төслийн удирдлагын газар” ОНӨУТҮГ-ын Метро төслийн менежерээр ажиллаж байсан Т.М, үеэл дүү, “А…” ХХК-ийн захирал Н.Б, мөн нэгжийн төслийн менежер А.Е нартай бүлэглэн уг үйлдлийг хийсэн гэж буруутгагдаж байна.
Тодруулбал, тэднийг эрх мэдэл, албан тушаалын байдлаа ашиглан өөрсдөдөө болон хамаарал бүхий этгээдүүдэд нийт 5.2 тэрбум төгрөгийн давуу байдал бий болгосон гэж прокурор үзжээ. Мөн дээрх гэмт хэргийн улмаас олсон гэх 2.6 тэрбум төгрөгийн хууль бус эх үүсвэрийг нуун далдалж, ашигласан буюу мөнгө угаасан гэж яллаж байна. Иймд Т.Даваадалай болон холбогдох хүмүүсийн хэргийг Эрүүгийн хуулийн 22.1.2 буюу эрх мэдэл, албан тушаалын байдлаа урвуулан ашиглах, 18.6.2.3 буюу мөнгө угаах зүйл, заалтаар яллах дүгнэлт үйлдэн Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд шилжүүлжээ.
