Батлан хамгаалах яамны харьяа Зэвсэгт хүчний “Алдар” спорт хороо түүхт 80 жилийн ойгоороо Монгол Улсын Ерөнхийлөгчийн зарлигаар төрийн дээд шагнал “Сүхбаатарын одон”-гоор шагнууллаа. Монгол Улсын Ерөнхийлөгч, Зэвсэгт хүчний Ерөнхий командлагч У.Хүрэлсүх одонг “Алдар” спорт хорооны Байлдааны туганд хүндэтгэлтэйгээр зүүж, спорт хорооны дарга хурандаа Г.Өсөхбаярт одонгийн үнэмлэхийг гардуулан өгөв. “Алдар” спорт хорооноос төрөн гарсан тамирчид 80 жилийн түүхэнд нэг алт, дөрвөн мөнгө, дөрвөн хүрэл медаль хүртжээ. Харин ДАШТ-ээс 12 алт, 22 мөнгө, 41 хүрэл медаль зүүсэн байна. Мөн “Алдар”-аар овоглосон тамирчдаас хөдөлмөрийн баатар долоо, төрийн соёрхолт болон ардын цолтон зургаа, гавьяат багш долоо, гавьяат дасгалжуулагч 25, гавьяат зүтгэлтэн гурав, гавьяат тамирчин 71 төрөн гарчээ.
Түүнчлэн бөхчүүдээс улсын аварга 13, арслан 18, гарди дөрөв, заан 23, харцага, начин цолтон 100 гаруй нь “Алдар”-аар овоглодог бол манлай уяачид, үндэсний сур, шагайн харвааны 37 мэргэн харваачийг эгнээнээсээ төрүүлжээ.
Монгол Улсын спортын төрлүүдийн дээд амжилтыг давхардсан тоогоор 1719 удаа шинэчлэн тогтоосон түүхэн гавьяаг “Алдар”-ынхан 80 жилийн хугацаанд байгуулжээ. Тус спорт хороо өмнө нь “Цэргийн гавьяаны улаан тугийн одон”-гоор шагнуулсан анхны спорт хороо болж байсан бол 80 жилийнхээ ой дээр “Сүхбаатарын одон”-г тугандаа заллаа.
