Дуучин Уламбаяр буюу Укагийн талаар сонирхолтой баримтууд

Зогсолтгүй хөдөлмөрлөж Монголын рок поп хөгжмийн ертөнцөд тэсрэлт хийн гялалзаж яваа дуучин Уламбаяр буюу Ука. Өвөрмөц дүр төрх, содон стиль имиж, шинэлэг уран бүтээлээрээ цаг ямагт фенүүдээ баярлуулж байдаг шаргуу уран бүтээлч. Хөдөлмөр хүнийг бүтээдэг болохын бодит жишээ болсон дуучин бүсгүйн талаар сонирхолтой мэдээллийг хүргэж байна. 

• 11-р сарын 6-ны өдөр төрсөн. Хилэнцийн орд. Өнөөдөр түүний төрсөн өдөр тохиож байна.  

• Түүний аав Увс аймгийнх. Харин ээж нь Хөвсгөл аймгийнх. 

• Аавынх нь талын эмээ өвөө нар нь өндөр хамартай улс байдаг. Тэднийгээ дуурайсан гэж тэрээр хэлж байв.
• Дуучин болохоосоо өмнө үсчин, гоо сайханч байсан бөгөөд бага байхдаа салонтой болно гэж мөрөөддөг байжээ. 
• "Нэг хороолол" гэх брэк бүжгийн хамтлагийн гишүүн байсан бөгөөд "Nature sounds"-д бүжгийн багшаар ажиллаж байсан.

• Жүжигчин болох хүсэлтэй байсан бөгөөд СУИС-д шалгалт өгсөн боловч хоёр дахь шатны шалгалтандаа тэнцэлгүй унаж байв.
• Өндрөөс айдаг бөгөөд энэ айдасаа давахыг маш их хүсдэг хэмээн нэгэн ярилцлагадаа дурдсан. 
• Киви хамтлагийн ахлагч бөгөөд хамтлаг 2004 оны 12-р сарын 1-ны өдөр байгуулагдсан. 

• Нийт 9 цомог гаргасан ба рок попын ертөнцөд гялалзаж явсан охидын хамтлагийн нэг юм. Тэд саяхан "The Night with Kiwi" тоглолтоо хийн дахин тайзнаа нэгдсэн билээ. 

• Тэрээр хөл бөмбөгийн тэмцээний үеэр нэгэн фен залуугийн өгзөг дээр гарын үсгээ зурж байв. 
• Чөлөөт цагаараа дэлгүүр хэсэх, кино үзэх дуртай. 
• 2011 онд анхны бие даасан "I am in Love" цомгоо гаргасан ба Соёлын тэргүүний ажилтан цол тэмдгээр шагнагджээ.

• 2015 онд өөрийн төрсөн өдрөөр нэрлэсэн "11.06" хэмээх цомгоо гаргасан бөгөөд ковер зураг дээрээ нөхрийнхөө десант цамцыг өмсөн авахуулсан байдаг. 
• Нийт таван бие даасан цомог гаргасан.
• Түүний санаанаас огт гардаггүй ном бол "Tuesdays with Morrie". Тус ном гарсан жилдээ Америкт бестселлер болж байв.

• 2016 онд гаргасан "Маргаашийн нар луу хамт аялах уу" дуун жинхэнэ тэсрэлт хийсэн юм. Тус дууны клип 15 сая гаруй хандалттай бөгөөд Youtube дэх Монголын хамгийн их үзэлттэй 10 бичлэгний нэг билээ.

• "Don't Stop" дуун Азийн шилдэг хип хоп 50 дууны жагсаалтад багтаж байв.

• Монголын рок поп хөгжмийн ертөнцөд шинэ өнгө нэмсэн уран бүтээлч гэж хүмүүс үнэлдэг төдийгүй үндэсний хувцсыг орчин үеийн хэв маягтай хослуулж "Uka Style"-ийг бий болгож чадсан юм. 

• Хар нүдний шил, монгол дээлээр гангарах залуусын давлагааг үүсгэсэн. 
• 2018 онд "The Voice of Mongolia" шоуны шүүгчээр ажиллаж, ялагчаар түүний дасгалжуулсан Ц.Энгүүн тодорсон.

• Киви хамтлагийн продюсер Б.Ангирмаагийн арга барилаар "The Voice" шоуны шилдэг оролцогчдыг дасгалжуулсан хэмээн нэгэн ярилцлагадаа хэлсэн.
• Тэрээр жинхэнэ галзуу, өөрийнхөөрөө, "The Voice of Mongolia" шоунд өнгө нэмсэн шүүгч, дасгалжуулагч байж чадсан юм. 

• 2019 онд "Нэгүн" студийн анхны бүрэн хэмжээний "Hi Honey" уран сайхны кинонд тогложээ. 
• 2020 онд аавынхаа гэгээн дурсгалд зориулж "Аавд" нэртэй уран бүтээл гаргасан. 

• Ука инстаграм дээр Монголын хамгийн олон дагагчтай уран бүтээлч юм. 
• Одоогоор 529 мянга гаруй хэрэглэгчид түүний хаягийг дагаж байна.
• Өнгөрсөн сарын 22-нд "Bounce" нэртэй шинэ уран бүтээлээ цацлаа. Түүний шинэ клипийг үзсэн хүмүүс "Ука үнэхээр тасархай имижтэй, цаг үеэ мэдэрсэн дуучин" хэмээн урмын үг бичсээр байна.