Э.Дөлгөөн: 25 насандаа TedX-ийн илтгэгч болох юмсан гэсэн хүсэл маань 18-тайд биелсэн

МОХ-ны ерөнхий нарийн бичгийн дарга, "Мөрөөдөлд хүрэх зам" ТББ-ын тэргүүн Э.Дөлгөөнийг “Шинэ салхи” буландаа урьж, амжилт хийгээд үзэл бодлынх нь талаар ярилцлаа. Залуу үеэ төлөөлөн шинэ салхи мэт хүч түрэн орж ирж байгаа түүний сонирхолтой ярилцлагыг хүлээн авч уншина уу.

-Монголын Оюутны Холбооны ерөнхий нарийн бичгийн даргаар томилогдоод багагүй хугацаа өнгөрсөн байна. Ямар шалтгаанаар МОХ-нд орсон бэ? 

-Би МУИС-д хууль, эрх зүйн чиглэлээр суралцаж байгаа. Ирээдүйд хүний эрхийг хамгаалсан шилдэг өмгөөлөгч болох зорилготой. Харин МОХ бол оюутнуудын эрх ашгийг хамгаалах үндсэн зорилготой. Миний хүсэл, мөрөөдөл ажиллаж байгаа байгууллагатай минь уялдаа холбоотой байгаа учраас МОХ-нд орсон.

-Сүүлийн үед МОХ-ноос хэрэгжүүлж байгаа ямар хөтөлбөр, аянууд байна?

-Онлайнаар “Амлалтын маск” “Оюутнуудаа дархлаажуулъя” гэх мэт аянуудыг зохион байгуулсан. Цар тахлаас үүдэн хичээл цахимаар орж байна. Тиймээс цахим хичээлтэй холбоотой уриалга гаргасан.

-Онцгой байдал зарлаж, хөл хорио тогтоосонтой холбогдон бүх шатны боловсролын байгууллагын үйл ажиллагаа цахим хэлбэрт шилжсэн. Цахимаар хичээл орох нь оюутанд яг ямар эерэг болоод сөрөг талтай байгаа вэ. Оюутнуудаас МОХ-нд хаягласан санал сэтгэгдэл хэр ирж байна?

-Хотод байгаа оюутнуудын хувьд асуудал бага байна. Харин хөдөө, орон нутагт байгаа залуусын хувьд интернетийн хурд муу, тасалдах гэх зэргээр сурах эрх ашиг нь нэлээд зөрчигдөж байна. Уг асуудлыг шийдэх үүднээс Монголын үндэсний томоохон компаниудтай хамтран гарц хайн ажиллаж байгаа.

-“Мөрөөдөлд хүрэх зам” ТББ-ын тэргүүн шүү дээ. Анх ямар зорилгоор үүсгэн байгуулж байсан бэ. Тэрхүү зорилгодоо одоо хүрч чадсан уу. Нийт хэдэн эвент зохион байгуулж, хэчнээн залуусыг хамруулж, ямар бодит үр дүнд хүрсэн бэ?

-2017 оны 10-р сарын 07-нд хамгийн анхны эвентээ хийсэн. 2017 оны 12-р сарын 21-нд ТББ-ын статусаа авсан. Нийт зургаан эвент зохион байгуулж 10,000-20,000 гаруй залуусыг хамруулсан. Тухайн үед Монголд яг залуус руу чиглэсэн боловсролын менторшип хөтөлбөр маш ховор байлаа. Залуусын үлгэр дууриалал авдаг хүмүүсийн зөвлөгөө яриаг тэдэнд хүргэхийн тулд Х.Идэр найзтайгаа хамтран энэхүү төслийг санаачлан хэрэгжүүлсэн. Анхны эвентэд дээд тал нь 50-60 хүн ирнэ гэж тооцоолж байв. Гэтэл 300 орчим залуус ирсэн. Бид ямар нэг ашиг олох зорилготой байгаагүй. Зарлагаа орлоготойгоо тэнцүүлэхээр тооцсон байсан. Үүнээс яг нэг сарын дараа “Мөрөөдөлд хүрэх зам-2” эвент зохион байгуулагдаж 1000 орчим хүүхэд, залуус хүрэлцэн ирсэн. Дөнгөж 17, 18 настай залуусын зохион байгуулсан арга хэмжээг сонирхон өөрсдийн боловсролд хөрөнгө оруулахаар манай үйл ажиллагаанд ирсэн залууст үнэхээр талархдаг.

-Та бүхэн илтгэгч нараа ямар шалгуураар сонгодог вэ?

-Манай зохион байгуулах баг 30 орчим хүний бүрэлдэхүүнтэй. Бид урих гэж байгаа хүнээ бүхий л талаас нь судалдаг. Салбартаа тэргүүлэгч хүнийг сонгож, илтгэгчээр урьдаг.

-Байгууллагууд хийсэн ажил, туршлага дээр үндэслэн хамтарч ажиллах, хөрөнгө оруулах шийдвэр гаргадаг. Анхны эвентээ зохион байгуулах гэж олон байгууллагуудтай уулзсан ч татгалзсан хариу их авсан. Ганц “Элит” сургууль дэмжиж хамтарч ажилласан гэж өмнө өгсөн ярилцлагадаа дурдсан байсан. Анхны эвент болон сүүлд зохион байгуулсан эвент хоёрын хооронд хэр их ялгаа байна?

-Япончууд хөрөнгө оруулалт хийхдээ хэр нэр хүндтэй компани вэ гэхээс илүү өмнө яг юу хийж байсан бэ гэдэгт анхаардаг гэж сонсож байсан. Бидэнд туршлага байхгүй байсан учраас татгалзсан хариу авах нь арга ч үгүй байсан биз. Манай найз Х.Идэр тухайн үед “Элит” сургуулийн сурагч, “Сурагчдын зөвлөл”-ийн дарга байсан учраас хамтарч ажиллах санал тавин анхны эвентээ тус сургууль дээр хийсэн. Бараг 100 орчим байгууллагад санал тавьсан. Бүгд татгалзсан. Сүүлийн эвент дээр бол нэлээд олон байгууллагууд өөрсдөө санал тавьж, хамтарч ажилласан.

-TedX-ийн хамгийн залуу илтгэгч шүү дээ. Урилга хүлээж авахад ямар санагдсан бэ?

-Өмнө TedX-ийн илтгэгч нарыг хараад 25 насандаа тэдэн шиг ингээд зогсох юмсан гэж боддог байсан. Ядаж 25 насандаа TedX-ийн илтгэгч болох юмсан гэсэн зорилго маань 18-хан насанд биелсэнд маш их баярладаг.

-ЭЕШ-нд Математик-749, Нийгэм-785, Англи хэл-629 оноо авсан. Энэ үзүүлэлтээрээ нийслэлд 11-р байрт орсон шүү дээ. Мэдээж хичээл зүтгэл үүнд нөлөөлсөн байх. Үүнээс гадна тактик их чухал гэж бодож байна. Энэ жил ЭЕШ өгөх гэж байгаа сурагчдад зөвлөгөө өгөөч?

-Яг үнэнийг хэлэхэд би 10 жилдээ математик, нийгэмдээ сайн хүүхэд байгаагүй. Манай ангийнхан бүгд мэднэ. ЭЕШ-ын оноо, мэргэжил болон сургууль сонголтоос шалтгаалан цаашдын ирээдүй минь хамаарах учраас хоцрогдлоо арилгахын тулд 12-р ангиасаа хичээсэн. Математикийнхаа хоцрогдлыг арилгахын тулд 7-12-р ангийн бүх агуулгыг өөрөө бие даан судалсан. Хүн ер нь өөрөө өөртөө хамгийн сайн багш гэдгийг маш сайн ойлгосон доо.

-Өөрийнхөө сонгосон мэргэжлийн талаар яриач. Яагаад хуульч болохоор шийдсэн бэ. Мэргэжил сонголтын талаар залууст ямар зөвлөгөө өгөх вэ?

-Аав минь надад энэ мэргэжлийг зөвлөсөн. Яагаад гэвэл тухайн үед би өөрөө ямар мэргэжил сонгохоо мэдэхгүй байсан. Ямартай ч би олны өмнө илтгэл тавих дуртай, логик сэтгэлгээтэй хүүхэд байв. Дараа нь бодоход миний зан араншинд яг тохирсон зөв мэргэжил санал болгосон юм шиг санагддаг. Хууль яалт ч үгүй надад тохирсон.

-Ойрын зорилгоосоо хуваалцана уу. “Мөрөөдөлд хүрэх зам” ТББ цаашид яаж өргөжин тэлэх вэ?

-Ойрын зорилго гэвэл сургуулиа амжилттай төгсөж, хуульчийн эрх авах юм. “Мөрөөдөлд хүрэх зам” ТББ-ыг дүү нартаа хариуцуулж үлдээхээр төлөвлөж байна.