Ж.Чинбүрэн: Эмийг жортой, жоргүй олгох талаар өмнө нь хуульд ямар зохицуулалт байсан өнөөдөр яг тэр хэвээрээ байгаа

Бүх эмийг жороор олгодог болсон нь хүндрэл үүсгэж буй талаар сүүлийн хэд хоног иргэд олон нийтийн сүлжээнд бичиж, шүүмжилж байна. Мөн, 10 дугаар сарын 1-нээс хэрэгжиж эхэлсэн Эм, эмнэлгийн хэрэгслийн тухай хуулийн шинэчилсэн найруулгыг өмнөх Улсын Их Хурлаар батлахад найруулгын алдаа гаргаснаас болж ийм асуудал үүсээд байгаа гэсэн мэдээллийг Эрүүл мэндийн сайд Т.Мөнхсайхан “МН25” дугаар суваг телевизд өгсөн ярилцлагадаа дурьджээ.

Тиймээс Улсын Их Хурал алдаатай хууль баталснаас болж ийм байдал үүссэн үү гэдэгт Улсын Их Хурлын эмч гишүүн Ж.Чинбүрэнгээс тодруулж, тайлбар авлаа.

 Ж.Чинбүрэн:  -Өнгөрсөн парламентын хаврын чуулганаар Эмийн асуудлаар сонсгол хийсэн. Сонсголыг ЭМИЙН ЧАНАР, ХҮРТЭЭМЖИЙГ НЭМЭГДҮҮЛЖ, БОЛОМЖИЙН ҮНЭ ӨРТГӨӨР ИРГЭДЭД ХҮРГЭХ ТОМ ТОГТОЛЦООГ ХИЙХЭД ямар асуудал тулгараад байна, юуг бид шийдвэрлэх шаардлагатай вэ гэдгийг тодруулах зорилгоор зохион байгуулсан. Тиймээс ч Эм, эмнэлгийн хэрэгслийн тухай хуулийн шинэчилсэн найруулгыг өнгөрсөн парламентаар батлахдаа эмийн худалдаа эрхлэгчдийн хариуцлагыг өндөржүүлсэн, нөгөө талаар иргэдээ хамгаалсан зохицуулалт оруулсан. Тэр нь жороор олгох ёстой эмийг жоргүй олгосон бол торгох тухай л заалт. 

• Өөрөөр хэлбэл, өмнө нь эмчийн бичсэн жорын дагуу худалдах эмийг эмийн сан жоргүй олгосон ч торгох шийтгэл хэрэгждэггүй байсан бол 10 дугаар сарын 01-нээс хэрэгжиж эхэлж, амь орж байна. Үүнийг л бүх эмийг жороор олгодог болсон гэж төөрөгдөл үүсгээд байгаа юм.

•  Энэ хуулийн ажлын хэсэгт ажилласан хүний хувьд хариуцлагатайгаар хэлэхэд одоо иргэдийг бухимдуулаад байгаа эмийг тусгай жороор олгох, энгийн жороор олгох, эсвэл жоргүй олгох гэдэг зохицуулалтыг хуучин яаж хэрэгжиж байсан яг тэр хэвээр нь үлдээсэн. Нэг ч үг, үсгийн өөрчлөлт оруулаагүй.

Түүнчлэн, эмч хүний хувьд хэлэхэд, манайд ямар ч эмийг иргэн авья гээд ороход эмийн санч май гээд өгчихдөг, ерөнхийдөө хүнс шиг хэрэглэдэг байдал газар авсан. Ганцхан жишээ хэлэхэд, өвчин намдаадаг эм болох “Ибупрофен”-ыг жороор олгож байгаад иргэд бухимдаж байх шиг байна. Энэ эм нь дотроо олон янз. Орц найрлагын ялгаа болон ямар тунгаар, ямар хугацаанд уух, том хүн уух уу, хүүхдэд уулгах уу гэдгээс шалтгаалж эмчийн бичгээр уувал өвчнөө эмчлэнэ, харин дур мэдэн ямар ч хамаагүй тунгаар, хэдэн ч хоног хамаагүй уувал ходоодны шархтай болно гэдгийг ойлго. Эмийн энэ замбараагүй хэрэглээ эргээд маш олон сөрөг асуудлыг үүсгэдэг. Тиймээс эмчид үзүүлээд эмчийн бичиж өгсөн хоног хугацаа, тун, нэршлээр хэрэглэж хэвшвэл иргэн та өөрийгөө л хамгаалж байна гэсэн үг. 

Дахин хэлэхэд, энэ эмийг жороор олгоно, энэ эмийг жоргүй олгоно гэдэг жагсаалтыг хуульчилж баталдаггүй. Тиймээс ташаа мэдээлэлд автахгүй байхыг хүсье.