Сүхбаатар аймгийн Эрдэнэцагаан сумын нутаг аймгийн төвөөс зүүн урд зүгт 190 км-т, сумын төвөөс хойд зүгт 30 км-т орших Жаргалант багийн Өвөр хөндий хэмээх газарт иргэн А /сэтгэцийн эмгэгтэй/ 2-р сарын 22-ны 18:00 цагийн орчим хажуу айлаасаа гараад сураггүй болжээ.
Энэ тухай дуудлагыг мөн өдрийн 23:40 цагт аймгийн Онцгой байдлын газар хүлээн авсан байна. Тус аймгийн Онцгой байдлын газрын Эрдэнэцагаан сум дахь 47 дугаар ангийн алба хаагчид, сумын Мэргэжлийн ангийнхан 2-р сарын 23-ны 01:55 цагаас эрэн хайх, аврах ажиллагааг эхлүүлж, мөн өдрийн 08:50 цагт сураггүй болсон газраас нь баруун урд зүгт 8 км-т орших Мухар-Эрэг гэдэг газраас хээрээс эсэн мэнд олж, ар гэрийнхэнд нь хүлээлгэн өгсөн гэж ОБЕГ-аас мэдээлэв.
