УИХ-ын гишүүн Д.Энхтуяа "Асрах үйлчилгээний тухай” хуулийн төслийг санаачлан, ахмад настнууд, хөгжлийн бэрхшээлтэй хүүхдүүд болон асрамж шаардлагатай бусад иргэдэд зориулсан төр-хувийн хэвшлийн хамтын ажиллагааг зохицуулах эрх зүйн орчныг бүрдүүлэхээр мэргэшсэн хуулийн фирмтэй хамтран ажиллаж байгаа.
Тус багийнхан өнгөрөгч сард хуулийн төслийн эхний хувилбарыг хэлэлцэж дууссан талаараа мэдээлсэн.
Тэгвэл өчигдөр /2025.11.10/ ЖАЙКА-тай хамтын ажиллагаагаа өргөжүүлж, ахмад настны асаргааны шинэ төв байгуулах талаар санал солилцжээ. Уулзалтад УИХ-ын гишүүн Д.Энхтуяа ЖАЙКА-ийн шинэ суурин төлөөлөгч Араи Рина болон ЖАЙКА-ийн гэрээт зөвлөх, судалгааны багийн гишүүн Кумико Нишимура нар оролцлоо.
Тэд ахмад настны эрхийн хамгаалал, тэр дундаа асаргааны үйлчилгээний чанар, хүртээмжийг сайжруулах чиглэлээр хамтран ажиллах боломжуудыг хэлэлцлээ. “Асрах үйлчилгээний тухай” бие даасан хуулийн төслийн анхны хувилбар бэлэн болсон бөгөөд олон нийт, судлаач, мэргэжлийн байгууллагуудаар хэлэлцүүлэх шатандаа орж байгааг танилцууллаа. Хуулийн төслийг боловсруулахдаа ЖАЙКА болон ХНХЯ-тай хамтран Япон улсад туршлага судалж, өргөн хүрээний судалгаанд тулгуурласан гэдгээ Д.Энхтуяа гишүүн танилцуулсан.
Ахмад настны жишиг асрамжийн төв байгуулах тухайд Японы нөхөн сэргээх болон асаргааны үйлчилгээний шилдэг туршлага дээр үндэслэн Монголд жишиг төв байгуулахаар ажиллаж буйгаа мөн танилцуулав. Тус төв нь ахмад настнаас гадна хөгжлийн бэрхшээлтэй иргэд, хүүхдэд зориулсан асрамж, нөхөн сэргээх үйлчилгээ үзүүлэх иж бүрэн бүтэцтэй байхаар төлөвлөж байгаа аж. Одоогоор ТЭЗҮ, газар эзэмшлийн асуудал шийдэгдэж, байгуулах бэлтгэл ажил явагдаж байна.
