Гэмт хэрэг үйлдэл эх орноосоо оргон зайлж, интерполоор эрэн сурвалжилж баривчилсан хүүгийнх нь талаар "Таван богд" группийн Ерөнхийлөгч Ц.Баатарсайханаас тайлбар хэлэхийг хүссэн сэтгүүлчийн биед халдсан явдал гарсан. Үүнтэй холбогдуулан "Глоб интернэшнл төв"-өөс сэтгүүлчийн эрхийг хамгаалах дараах мэдэгдлийг гаргажээ. Мэдэгдлийг бүрэн эхээр нь хүргэж байна.
- Тас.мн сайтын сэтгүүлч А.Баярмаагийн биед Таванбогд группын гүйцэтгэх захирал Ц.Баатарсайхан нь 2025.09.19-ний өдөр хүч хэрэглэн халдсан үйлдлийг “Глоб Интернэшнл” төв эрс буруушааж байна.
Монгол Улсын Үндсэн хуулиар “мэдээлэл хайх, хүлээн авах эрх” нь иргэний үндсэн эрх хэмээн тунхагласан бөгөөд үүнийг олон улсын гэрээ конвенц болон холбогдох хууль тогтоомжоор мөн адил баталгаажуулсан.
Сэтгүүлчийн биед халдсан үйлдэл нь эрүүл мэндийн халдашгүй байдлын эсрэг гэмт хэргийн шинжтэйгээс гадна Монгол Улсын Үндсэн хуулиар хамгаалагдсан халдашгүй, чөлөөтэй байх эрхийг зөрчсөн төдийгүй Эрүүгийн хуулийн 14.3 дугаар зүйлийн “...Өөрийн, эсхүл бусдын хууль ёсны ашиг сонирхлыг хөндсөн аливаа мэдээллийг олон нийтэд тараах, тараалгахгүй байхын тулд хэвлэн нийтлэгчийн хуульд нийцсэн үйл ажиллагаанд хүч хэрэглэж, хүч хэрэглэхээр заналхийлсэн... хууль ёсны ашиг сонирхолд нь ноцтой хор уршиг учруулахаар сүрдүүлсэн....” гэсэн заалтыг зөрчсөн үйлдэл гэж бид үзэж байна.
Цаашид ийм зөрчил гарсан тохиолдол бүрд Глоб Интернэшнл төвд яаралтай хандан эрхээ хамгаалуулахыг хэвлэл мэдээллийн байгууллагууд, сэтгүүлчдэдээ хандан уриалж байна.Дээрх нэр бүхий этгээдээс сэтгүүлчийн биед бүдүүлгээр халдсан үйлдлийг хууль, хяналтын байгууллага үнэн зөвөөр шалгаж, эрх зөрчигчдөд хуулийн дагуу хариуцлага тооцно хэмээн найдаж байна гэжээ.
Сэтгэгдэл (2)