Энэ сарын 28-ныг хүртэлх цаг агаарын урьдчилсан төлөвийг танилцуулж байна
Цаг уур, орчны шинжилгээний газраас ирэх долоо хоногийн цаг агаарын урьдчилсан төлөвийг танилцуулсан байна. Тодруулбал, өнөөдөр буюу есдүгээр 22-нд нутгийн төв хэсгээр, 23-нд нутгийн зүүн хагаст бороо, уулаараа нойтон цас орж, сэрүүсэх төлөвтэй байна.
Хур тунадас: 20-нд баруун аймгуудын нутгийн зарим газраар, 21-нд баруун аймгуудын нутгийн зарим газар, төвийн аймгуудын нутгийн баруун хэсгээр, 22-нд баруун аймгуудын нутгийн зүүн хэсэг, төв болон говийн аймгуудын ихэнх нутгаар, 23-нд нутгийн зүүн хагаст, 24-нд баруун аймгуудын нутгийн зүүн хэсэг, зүүн аймгуудын нутгийн зүүн хэсгээр, 25-нд Хөвсгөлийн уулархаг нутаг болон говийн бүс нутгийн өмнөд хэсгээр, 26-нд говийн бүс нутгийн зүүн өмнөд хэсгээр, 27, 28-нд нутгийн хойд хэсгээр бороо, уулаараа нойтон цас орно.
Салхи: Ихэнх нутгаар секундэд 5-10 метр, 22-нд говь, тал, хээрийн нутгаар, 23-нд зүүн аймгуудын нутгаар түр зуур секундэд 18-20 метр хүрч ширүүснэ.
Агаарын температур: 22-нд нутгийн баруун хагаст, 23-нд нутгийн зүүн хагаст сэрүүхэн байх боловч бусад хугацаанд Алтай, Хангай, Хөвсгөл, Хэнтийн уулархаг нутаг, Завхан, Заг Байдрагийн голуудын эх, Идэр, Тэс, Тэрэлж голын саваар шөнөдөө -3-8 г хэм хүйтэн, өдөртөө +8+13 хэм, говийн бүс нутгийн өмнөд хэсгээр шөнөдөө +3+8 хэм, өдөртөө +20+25 хэм, бусад нутгаар шөнөдөө 1+4 хэм , өдөртөө +11+18 хэм дулаан байна.
Улаанбаатар хотод, энэ сарын 22-23-нд бороо орно. Мөн эдгээр өдрүүдэд сэрүүсэж шөнөдөө Яармаг-Сонгины орчмоор 0-5 хэм хүйтэн, бусад хэсгээр -1+4 хэм, өдөртөө +6+11 хэм, бусад хугацаанд дулаахан шөнөдөө +1+6 хэм, өдөртөө +11+18 хэм дулаан байна.
Есдүгээр сарын 24-нөөс эхлэн баруун аймгуудын нутгаар цаашдаа ихэнх нутгаар өдөртөө дулаарах төлөвтэй байгаа ажээ.
