Боловсролын сайд П.Наранбаяр Японы “Шицүкэно кай-Ёс зүйн нийгэмлэг”-ийн тэргүүн хатагтай Ито Наоког хүлээн авч уулзлаа.
Хатагтай Ито Наоког Японы Засгийн газрын буцалтгүй тусламжаар “Монгол-Японы эмнэлэг” байгуулах санаачилгыг гаргаж, шийдвэрлэхэд чухал үүрэг гүйцэтгэсэнд талархаж буйгаа сайд П.Наранбаяр илэрхийлээд, цаашид боловсролын салбарт хамтран ажиллах талаар хоёр тал санал солилцлоо.
Тус нийгэмлэг нь хүрээлэн буй орчин, гэр бүл, сургууль, албан байгууллага, нийгэмд тулгарч буй олон төрлийн асуудлыг шийдвэрлэх, хүний сэтгэл мэдрэмжийн чадамж /Emotional intelligence-EQ/ -ийг хөгжүүлэхэд чиглэсэн үйл ажиллагаа хэрэгжүүлдэг юм.
Японы “Шицүкэно кай-Ёс зүйн нийгэмлэг” нь “Монгол, Японы “Ёс жудаг” уран бичвэрийн хоёр дахь үзэсгэлэнг Улаанбаатар хотноо Чингис Хаан үндэсний музейд зохион байгуулж байна.
Монгол, Японы хамтарсан “Шицүкэ-Жудаг” уран татлагын үзэсгэлэнг Элчин сайд асан С.Хүрэлбаатар санаачлан 2018 онд Улаанбаатар хотноо зохион байгуулж байсан агаад энэ удаагийн үзэсгэлэнд Монгол Японы уран бүтээлчид, нийгмийн зүтгэлтнүүдийн 60 гаруй уран бүтээл дэлгэгджээ.
