Бүлэг зодооны хэрэгт холбогдож, яллагдагчаар татагдсан гэх “Таванбогд” группын Ерөнхийлөгч Ц.Баатарсайханы хүү, "Говь" ХК-ийн Гүйцэтгэх захирал Б.Амарсайхан долдугаар сарын 20-нд Монгол Улсын хилээр зугатан гарснаас хойш сар гаруй хугацаа өнгөрөөд байна. Тэрбээр хуулийнханд "Найз охины бие гэнэт муудсан. Зайлшгүй очих шаардлагатай байна. Энэ сарын 27-нд буцаж ирнэ" гэж хэлээд гадаад руу явсан боловч өнөөдрийг хүртэл Монголд буцаж ирээгүй юм.
Түүнтэй хамт хэрэгт холбогдсон хүмүүсийг 30 хоногийн хугацаатай баривчлан хорьж шалгаж, эхнээсээ суллагдсан. Тэдний хувьд тухайн үедээ хар тамхины шинжилгээнд орж, мансуурсан байсан нь тогтоогдсон бөгөөд холбогдох мэдүүлгүүдээ өгч хэрэг нь тодорхой болж буй.
Харин Б.Амарсайханы хувьд шинжилгээнд ороогүй, долдугаар сарын 27-нд Монголд ирмэгц нь хар тамхины тест авна хэмээн хэлж байсан. Харамсалтай нь түүнээс тестээр авах хар тамхины илрэх 30 хоногийн хугацаа нь наймдугаар сарын 18-ны өдрөөр дуусчээ. Өөрөөр хэлбэл эрүүгийн хэрэгт шалгагдан, яллагдагчаар татагдсан гэх Б.Амарсайхан хар тамхи хэрэглэсэн эсэхээ тогтоолголгүй, оргон зайлсан нь тодорхой болоод байна.
Цагдаагийн байгууллагаас түүнийг Интерполоор эрэн сурвалжлах хүсэлтээ илгээсэн гэж долдугаар сарын 29-нд мэдэгдэж байсан. Гэвч өнөөдрийг хүртэл мэдээлэл нь байршаагүй байна. Энэ нь “Таван богд” группийн Ерөнхийлөгч, түүний аав Ц.Баатарсайханы нөлөөлөл оржээ гэх хардлага үүсгэж эхэллээ.
Түүний аав Ц.Баатарсайхан нь улс төр болон бизнест нөлөө бүхий Монгол Улсын Хөдөлмөрийн баатар бизнесмэн бөгөөд Монголын банкны салбарт тэргүүлэгч ХААН банк, Таванбогд капитал, Таванбогд финанс, нийтийн хоол, үйлчилгээнд байр сууриа олсон KFC, Little sheep, Nagomi, Pizza Hut болон Говь, Моnbeef зэрэг үндэсний үйлдвэрлэлийг эзэмшигч төдийгүй гадаадын 30 орчим брендийн албан ёсны эрхтэй Монголын олигархи юм.
Хэргийг сөхвөл, Сүхбаатар дүүргийн III хорооны нутаг, ХААН банк байрлаж буй байрны эсрэг талд орших “Cante” гэх шөнийн цэнгээний газрын үүдэнд энэ сарын 18-19-нд шилжих шөнийн 03.45 цагийн үед зодоон болж, нэг залуу хүнд гэмтсэн байдаг. Иргэн С-г найзуудтайгаа баарнаас гарч явахад нь Т, С нар агсам тавьж зодсон аж. Тухайн өдрийн зодооны бичлэг цахим хуудаст хэсэгчилсэн байдлаар цацагдсаар байсан ч эхнээсээ устгагдсан. Харин тэдэнд зодуулсан гэх С гавал, тархины гэмтэлтэй ГССҮТ-д хэвтэн эмчлүүлж байгаад БНСУ-д эмчилгээнд явсан. Биеийн байдал нь хүнд, нэг нүд нь юм харахгүй байгаа гэж эгч нь мэдэгдэж байсан билээ. Тухайн үед тэд хохирогчид 450 сая төгрөг өгч тохиролцохыг оролдсон ч Эрүүгийн хуулийн дагуу хэрэг үүсгэн шалгаж буй билээ.
Сэтгэгдэл (3)