Сонгинохайрхан дүүргийн 21-р хорооны нутаг дэвсгэрт байрлах Ар Гүнтийн зуслангийн айл өрхүүд рүү 20-25 насны 3-4 хүний бүрэлдэхүүнтэй бүлэг этгээд өнгөрсөн сарын 30-наас энэ сарын 4-ний хооронд халдаж, ноцтой гэмт хэрэг үйлдсэн байна.
Тэд тухайн айлуудын цонхыг эвдэн нэвтэрч, их хэмжээний цахилгаан хэрэгсэл, үнэт эдлэл, компьютер зэргийг хулгайлсан төдийгүй гэр орчныг нь сүйтгэжээ.
Мөн зарим иргэдийн автомашин, 4 дугуйт тээврийн хэрэгслийг дээрэмдэж, эд хөрөнгийн хохирол учруулсан байна. Үүнээс гадна тэд согтууруулах ундаа хэрэглэсэн байжээ.
СХД-ийн Цагдаагийн I хэлтсээс дээрх хэргийг илрүүлэхээр ажиллаж байгаа бөгөөд эх сурвалжийн мэдээлснээр, холбогдогч этгээдүүд нь тухайн орчмын оршин суугч байх магадлалтай гэж үзэж байна. Мөн өмнө нь ижил төрлийн хэргүүдэд нэр холбогдож байсан байж болзошгүй аж.
Цагдаагийн байгууллагаас иргэдэд хандан, хэрэв эд зүйлсээ алдсан, эсвэл орон байранд нь хулгай орсон бол СХД-ийн Цагдаагийн I хэлтэст мэдэгдэж, хамтран ажиллахыг уриалж байна.
