УИХ-ын гишүүн Т.Доржханд 200 мянган ажлын байр хамгаалах тогтоолын төсөл өргөн барилаа

Коронавирусний үед иргэдийн орлого, ажлын байрыг хамгаалах тогтоолын төсөл боловсруулж, өргөн барих болсноо УИХ-ын гишүүн Т.Доржханд өнөөдөр олон нийтэд танилцуулсан байна. Тэрбээр, “Одоо бол иргэн, ААН-үүдэд эргэлтийн хөрөнгө дутагдаж байна. Хамгийн багадаа 200 мянган ажлын байрыг хамгаалах боломж бидэнд байна. Монголбанканд 7.6 их наяд төгрөг бий. Гэхдээ банкууд мөнгө гаргахгүй, гаргавал дампуурах магадлалтай гэсэн айдастай байгаа. Ийм үед Засгийн газар идэвхтэй ажиллах ёстой. Төв банкны бодлогын хүү 5 хувьтай байгаа. Энэ хувиар Засгийн газрын үнэт цаас гаргах боломжтой. Ингэснээр зээлийн хүүг хүчээр тогтоох бус банканд байгаа санхүүгийн эх үүвсэрийг бизнес рүү шахах юм. Төвбанканд байгаа эх үүсвэрийг татаж аваад 3 жилийн хугацаатай, 5 хувийн хүүтэй, эхний нэг жилд зөвхөн хүүгийн төлбөрөө төлдөг хэлбэрээр бонд болгон гаргаснаар 200 мянган ажлын байрыг хадгалах боломжтой юм. Энэ талаар судалгаа боловсруулж Засгийн газарт зөвлөмж болгон хүргүүлсний дээр УИХ-ын тогтоолын төсөл болгон боловсруулж, өргөн барьж байна” гэлээ.