Карентины үеэр шинэ хоббитой болсон залуус-Д.Хулан /Coursera/

Сайн байцгаана уу? Намайг Д.Хулан гэдэг. Хүмүүнлэгийн ухааны их сургуульд сэтгүүлч мэргэжлээр суралцдаг. Төгсөх курсийн оюутан. Хөл хорионы үеэр 30 гаруй уран зохиол, яруу найргийн ном уншсан. Одоо тагтаа паблишингаас эрхлэн гаргасан Нобелийн шагналт зохиолч Мө Яны “Мэлхий” роман, Зөвлөлтийн суут найруулагч Андрей Тарковскийн өдрийн тэмдэглэл, ярилцлага, дурсамжийг багтаасан “Хугацаан доторх хугацаа”, болон  Б.Базарсүрэн ахын “Номын жор”, Каваками Миэкогийн “Breast and Eggs” романыг уншиж байна.  

Сүүлийн үед олон ном зэрэг сэлгэж уншдаг зуршилтай болсон. Өнгөрсөн жилийн хувьд Маркесийн “Тахлын үеийн дурлал”, Милан Кундерагийн “Тэвчихийн аргагүй хөнгөн оршихуй” романууд сэтгэлд тод үлджээ. Хоёул удтал санаанаас гараагүй. Олон зүйл эргэцүүлэхэд хүргэсэн агуу бүтээл. “Тахлын үеийн дурлал”-ын хувьд хайрыг бүхий л өнцгөөс нь хүүрнэсэн гэдгээрээ онцлогтой. Гэр бүлийн хайр, амраг хосын хайр, залуу насны гал халуун хийгээд өтөл насны сэтгэл уярам хайрыг ч мөн өгүүлнэ. Эл хоёр бүтээлийг энд хэдхэн үгээр томьёолж сэтгэгдлээ илэрхийлэх боломжгүй учир уншаагүй бол уншаад үзэхийг зөвлөж байна. 

Мөн нэгдүгээр ангийн дүүдээ уншиж бичихийг зааж өгөх том үүрэг хүлээсэн. Дүү маань үсгээ холбож уншаад сурчихсан. Их ахицтай явж байна. Хажуугаар нь гэрт байгаа хугацаагаа ашиглаад Coursera-гийн онлайн хичээлд хамрагдаж байна. Энэ платформыг олон хүн мэдээсэй гэж хүсдэг. Дэлхийд нэртэй их дээд сургуулиудын бүх төрлийн онлайн хичээлүүд байдаг. Ихэнх сургалтад нь Financial aid /санхүүгийн туслалцаа/ авах өргөдөл бичээд үнэгүй сууж болдог. Сертификат олгодог гээд олон давуу талтай. Netflix-ээс кино их үзнэ. Сүүлд үзсэнээс Money Heist, Our planet, Locked up, The Witcher цувралууд онцгой таалагдсан шүү.