Ц.Мөнхжин: Бүжгээс олон гоё мэдрэмжүүдийг авдаг

Өсвөр үеийнхэнд мэргэжил сонголтын талаар мэдээлэл өгөх зорилготой 3/1 цуврал контент танд хүрэхэд бэлэн боллоо. Анхны дугаартаа бид СУИС-ийн Бүжгийн урлагийн сургуулийн Бүжиг найруулгын ангийг энэ жил төгссөн залуу бүжигчин Ц.Мөнхжинг урьж ярилцлаа. Бид зочныхоо мэргэжлийн талаар үндсэн 3 асуултын хүрээнд ярилцахаас гадна ажил мэргэжлийн онцлогийг харуулсан сонирхолтой “Бонус+1” богино видеог нэмэлтээр  хүргэх юм.

Асуулт НЭГ. СУИС-ийн Бүжгийн урлагийн сургуульд 4 жилийн турш суралцахдаа ямар төрлийн хичээлүүдийг үзэж байсан бэ? Тэр талаар үзэгч уншигчдад мэдээлэл өгөөч?

Ц.Мөнхжин: -Манай СУИС-БУС нь дотроо бүжигчин, бүжгийн багш, бүжиг найруулга дэглээч гэсэн 3 төрлөөр сургалтаа явуулдаг. Миний хувьд бүжиг найруулга, дэглээчээр төгссөн. Мэдээж хүмүүсийн сайн мэддэгээр бүжгийн ур чадварын хичээлүүд орохоос гадна нэмэлтээр бүжиг гэдэг бол хөгжимтэй зайлшгүй холбоотой учраас нот, аяны задаргаа, хөгжмийн зохиолууд  дээр хэрхэн ажиллах вэ, гэх мэтчилэн хичээлүүд  ордог. Ерөнхий эрдмийн хичээлүүд гэхэд бүжгийн бүтээлүүдийн түүх, хэзээ хаана хэрхэн үүссэн тухай гээд судалдаг.

-Ур чавдарийн хичээл, ерөнхий эрдмийн хичээлийн тэнцвэртэй байдлыг хувиар авч үзвэл...?

-Ерөнхийдөө 60/40 байдаг

-Танай ангийнхны хувьд төгсөөд сонирхсон бүжгийн төрлөөрөө ажиллаж байна уу. Аль эсвэл илүү сайн чаддаг,өөрт тохирох бүжгийн төрлөөрөө ажиллаж байна уу?

-Миний ажигласнаар бол суралцах хугацаандаа 20% нь монгол ардын бүжиг талдаа, үлдсэн хэд нь энэ энэ төрөлдөө гээд аль хэдийн тодорхой болчихсон байдаг. Бас нэг боломж гэж хэлмээр зүйл нь анх бүжгийн аль нэг төрөлдөө сайн байсан хүүхэд манай сургуульд ороод 4 жилийн хугацаанд суралцахдаа бусад бүх төрлөөр суралцаад, мэдрэмжийг нь аваад ирэхээрээ яг өөрийнхөө хүсэж байгаа бүжгийн төрлөө олж нээдэг. Тэгсний дараа төгсөж гараад мэргэжлийн байгууллага, чуулга зэрэгт ажиллах эсвэл өөрийнхөө сонирхолтой төрлөө хөгжүүлэх, чөлөөт уран бүтээлч болох боломжтой санагдсан.

Тэхээр уншигчдад маань ойлгож байгаа байх, бүжигчин болох хүсэлтэй, бүжгээр хичээллэх дуртай хүмүүс хэрэв  мэргэжлийн сургуульд нь орвол өөрийнхөө чадамжийг тодорхойлох,нэмэгдүүлэх,аль төрөлд илүү чадвартай зэргээ мэдэж бүжгийн бүх төрлөөр хичээллэх нь байна шүү.

Асуулт ХОЁР. Чиний бодлоор төрөлхийн авьяастай хүн бүжигчин болох ёстой юу. Эсвэл авьяасгүй ч гэсэн хөдөлмөр, чин хүсэл тэмүүлэлтэй хүн бүжигчин болж чадах уу?

-Миний бодлоор авьяас бол зөвхөн дуу хоолой гэж би боддог. Хүн бүрт 1%-ийн байгалиас, эцэг эхээс заяасан авьяас байгаа.Үүн дээр 99%-ийн хөдөлмөр нэмэгдвэл сурахгүй зүйл байхгүй гэж би боддог. Тиймээс хүсэл мөрөөдөлтэй хүн бүр бүжигчин болох боломжтой. Энэ нь огт сурч чаддаггүй зүйл биш. Яахав мэдээж хүн бүрийн сурах, хүлээж авах чадвар харилцан адилгүй учраас суралцах цаг хугацааны хувьд өөр өөр л байдаг.

\Асуулт ГУРАВ. Сүүлийн асуулт. Сургуулиа төгсөөд нийгэмд ажлын байран дээр гарахад танай салбарын хүмүүс залуусаа хэрхэн хүлээж аваасай гэж чи хүсдэг вэ?

-Мэдээж ажлын байран дээр гарахад шинэхэн төгсөгчдийн хувьд хэцүү ч, сайхан ч  зүйлүүд зөндөө байдаг. Бид бас ахин суралцсаар л байдаг. Урлагийн байгууллагын ах эгч нараас залуус биднийг илүү нээлттэй хүлээж аваасай л гэж хүсдэг дээ.

Гэхдээ хүмүүст найдах бус, хэрвээ чи бүжигт хайртай, дуртай л бол бүжгээр дамжуулж амьдралаас авч байгаагүй маш олон гайхалтай мэдрэмжүүдийг, бас хөгжмийн болон гоо зүйн мэдлэг мэдрэмжийг авах болно гэдгийг залуустаа хандаж хэлье. Бүтэн нэг жилийн турш бэлтгэл хийгээд түүнийгээ тайзан дээр 3 минутад багтааж үзүүлээд үзэгчдийн халуун алга ташилтыг сонсож мэдрэхэд маш сайхан байсан. Миний хувьд хамгийн том урам, том  шагнал энэ байсан. Дээр нь бүжиг биднийг эрүүл зөв амьдралын дадал хэвшилд сургадаг шүү дээ.  

-Ярилцсанд баярлалаа.