Монгол Улсын Ерөнхийлөгч У.Хүрэлсүхийн Бүгд Найрамдах Киргиз Улсад хийж буй төрийн айлчлалын хүрээнд Монгол, Киргизийн бизнес форум болж, хоёр орны төр, засгийн байгууллагууд, бизнесийн төлөөлөл, хөрөнгө оруулагчид оролцлоо. Монгол-Киргизийн бизнес форумыг Монгол-Киргизийн Засгийн газар хоорондын комиссын Монголын хэсгийн даргын хувьд нээж үг хэллээ.
Манай хоёр улс нь 1992 онд дипломат харилцаа тогтоосноос хойш улс төр, худалдаа, эдийн засаг, соёл, боловсрол зэрэг бүхий л салбарт идэвхтэй хамтран ажиллаж ирсэн.
Хоёр улсын төрийн тэргүүн нарын айлчлалууд нь манай хоёр орны харилцааг шинэ түвшинд хүргэж, худалдаа, эдийн засгийн хамтын ажиллагааг өргөжүүлэх, ард түмний найрамдал нөхөрлөлийг бэхжүүлэхэд чухал хувь нэмэр оруулж байна.
Монгол Улсын Ерөнхийлөгчийн санаачилсан “Тэрбум мод” болон “Хүнсний хангамж, аюулгүй байдал” үндэсний хөдөлгөөнүүдийн хүрээнд бид Киргиз Улстай хамтран ажиллах, хүнсний нийлүүлэлтийн тогтвортой байдлыг хангах, хамтын ажиллагааг өргөжүүлэх чиглэлд онцгой анхаарч байна.
Өнөөдрийн уулзалт нь хоёр орны төр, хувийн хэвшлийг харилцан үр өгөөжтэй, зах зээлийн эрэлт хэрэгцээ, технологийн дэвшлийг уялдуулсан, бодит зорилго бүхий хамтын ажиллагааг хэлэлцэх чухал индэр боллоо.
Хоёр орон цаашид;
Хөдөө аж ахуй, хүнсний үйлдвэрлэл, мах, махан бүтээгдэхүүн, ноос, ноолуур, арьс шир боловсруулах чиглэлээр хамтарсан үйлдвэрүүд байгуулж олон улсын зах зээлд гаргах;
Тээвэр ложистик, аялал жуулчлал, боловсрол, шинжлэх ухаан, дэвшилтэт технологийн чиглэлээр хамтын ажиллагааг гүнзгийрүүлэх; жимс, хүнсний ногооны нийлүүлэлтийг нэмэгдүүлэх,харилцан туршлага солилцох,мэргэжилтэн бэлтгэх;
Хөрөнгө оруулалтын таатай орчин бүрдүүлж, бизнес эрхлэх нөхцөлийг тогтвортой, ойлгомжтой болгох чиглэлээр бодит арга хэмжээнүүдийг авч хэрэгжүүлэхээр боллоо.
