С.Амарсайхан: “Монголын Эдийн Засгийн Форум-2025” энэ жил “Итгэлцлийг дахин сэргээх нь” уриан дор амжилттай үргэлжилж байна. Миний бие “Бүсчилсэн хөгжил ба Тээвэр логистикийн хөрөнгө оруулалт” салбар хуралдаанд панелистээр оролцож, бүсчилсэн хөгжлийн бодлого, тээвэр логистикийн стратегийн ач холбогдлын талаар санал бодлоо хуваалцлаа.
Монгол Улсын Засгийн газрын 2024–2028 оны үйл ажиллагааны хөтөлбөрийн тэргүүлэх чиглэл “Шинэ сэргэлтийн бодлого” нь эдийн засгийн дэд бүтцийг шинэчлэх, салбар хоорондын уялдааг сайжруулах, бүсчилсэн хөгжлийг тэнцвэржүүлэхэд чиглэж байна. Монгол Улс өргөн уудам газар нутагтай, хүн ам сийрэг суурьшсан, дэд бүтцийн нөхцөл харилцан адилгүй, зах зээл жижиг, логистикийн зардал өндөртэй тул эдгээр асуудлыг шийдвэрлэх шаардлагатай.
Тиймд Бүсчилсэн хөгжлийн бодлогын хүрээнд чөлөөт бүс, хуурай боомт, логистикийн төвүүдийг орон нутгийн хөгжлийн бодлоготой уялдуулан эдийн засгийн коридоруудтай үе шаттай холбох бодлого хэрэгжүүлнэ. Өөрөөр хэлбэл, Монгол Улсын 330 сумыг үнэлж, 91 өсөлтийн төв, 7 макро бүсийг тодорхойлсон бөгөөд эдгээрийг кластер хэлбэрээр хөгжүүлэхээр төлөвлөсөн. Ингэснээр хотуудын төрөлжсөн хөгжлийг дэмжих, технологийн парк, аж үйлдвэрийн төвүүд байгуулах, үндэсний болон олон улсын мега төслүүдийг хэрэгжүүлэх нөхцөл бүрдэж байгаа юм.
Цаашид аймаг, сумдын төвүүдийг тээвэр, худалдаа, үйлчилгээний цогцолбор болгон хөгжүүлж, иргэдэд хүртээмжтэй үйлчилгээ үзүүлэх, орон нутгийн бүтээгдэхүүнийг зах зээлд шууд хүргэх логистикийн шинэ шийдлүүдийг хэрэгжүүлэх зорилт тавьж байна. Бүсчилсэн хөгжил бол Монгол Улсын цорын ганц бөгөөд хамгийн зөв гарц шийдэл юм.
