Дуурийн театрын үе үеийн уран бүтээлчид театрын захирал, Монгол Улсын гавьяат жүжигчин Д.Алтанхуяг болон удирдлагын багийг яаралтай огцруулах талаар баримт дэлгэж мэдээлэл хийлээ.
Энэ асуудал өнөөдөр гэнэт гарч ирээд, төр засагтаа хандаж байгаа асуудал биш хэмээн уран бүтээлчид онцолсон. Улс хэмнэлтийн горимд шилжиж байхад Д.Алтанхуяг захирал театрыг дотор нь тус тусад нь олон салбар болгож салгаад тэр театр бүр дээрээ дөрвөн шинэ дарга томилсон. Улс нь данхгар бүтцээ хумих гэж байхад дуурийн театр дарга нарын орон тоог шинээр нэмж уран бүтээлчдийн орон тоог хасаж буй. Үүнээс үүссэн уран бүтээлчдийн бухимдал туйлдаа хүрч Д.Алтанхуягийн томилгоог улстөрийн шинж чанартай байж болзошгүй хэмээн тэд хардаж эхэлжээ. Учир нь МАН-ын жагсаалтаар УИХ-ын сонгуульд нэр дэвшээд УИХ-ын гишүүн болж чадаагүй хүнийг олон жилийн түүхтэй энэ театрын даргаар томилсон нь албан тушаалын наймаа гэж харагдаж байгаа ажээ.
Тиймээс намын томилгоогоор дарга болсон энэ хүн эрх мэдэл, албан тушаалаа ашиглаж найз нөхөд болон ойр тойрны хүмүүсээ даргын суудалд томилж байна.
Төрийн албаны зөвлөлийн 10 шалгуур үзүүлэлтийг хангасан УДБЭТ-ийн захирлаар томилогдох ёстой. Атал энэ хүн шалгуур үзүүлэлтийн 40 хувьд ч хүрдэггүй. Төрийн албаны зөвлөл Д.Алтанхуягийг шаардлага хангаагүй тул “Томилж болохгүй” гэсэн боловч хуулиа зөрчиж томилсон байдаг.
Энэ хүн томилогдмогцоо хамаарал бүхий өөрт нь багшилж байсан Ганцэцэг гэх тэтгэврийн нас нь хэтэрсэн хүнийг 3.600.000 төгрөгийн үндсэн цалинтай уран сайхны удирдагчаар томилжээ. Энэ нь тус театрын уран бүтээлчдийн цалингаас 2 дахин өндөр цалин аж.
МУГЖ балетчин Д.Алтанхуяг тус театрын захирлар томилогдсоноосоо хойш юу хийсэн бэ гэвэл хууль зөрчсөн олон үйлдэл хийсэн хэмээн ярьсан. Тухайлбал, open data мэдээллийн сангаас авсан баримтаар төрсөн дүүгийнхээ компани руу байгууллагын сангаас худалдан авалт хийсэн баримт байгаа аж. Энэ үйлдэл нь Ашиг сонирхлын зөрчлийн тухай болон Бараа үйлчилгээ худалдан авах тухай зэрэг хэд хэдэн хуулийг зөрчсөн гэнэ.
Мөн өөрийн багын найз, урлагтай ямар ч хамааралгүй тагнуулын сургууль төгссөн Батхүрэл гэдэг хүнийг шууд ерөнхий менежерээр томилсон. Түүнчлэн театрт урьд өмнө нь огт байгаагүй уран бүтээлийн гүйцэтгэх алба нэртэй данхгар бүтцийг бий болгосон.
Үг хэлж хүсэлт тавьсан уран бүтээлчдийг үл тоож, та нарын юу хийх чинь надад хамаагүй хэмээн хөөж гарган, үл ойлголцоод удаж буй тул уран бүтээлчид ийнхүү арга ядахдаа олон нийтэд мэдээлэл хийж буй ажээ. Тиймээс цаашид үл ойлголцол энэ хэвээр үргэлжилж, дарамт шахалт хэтэрснээс Үндэсний баяр наадмын концертод оролцох боломжгүй, ажил хаях хэмжээнд хүрч буйгаа мэдэгдсэн юм.
Сэтгэгдэл (0)
Сэтгэгдэл бичигдээгүй байна