Монгол Улсын Төрийн шагналт, Ардын уран зохиолч, Соёлын гавьяат зүтгэлтэн, Хил хамгаалах байгууллагын ахмад уран бүтээлч Пунцагийн Бадарч Монгол Улсын Ерөнхийлөгчийн зарлигаар “Хөдөлмөрийн баатар” цол хүртлээ.
Энэхүү эрхэм шагналыг нь тохиолдуулан Хил хамгаалах байгууллагын хамт олон, залуу хилчид хүндэтгэлтэйгээр угтан авлаа.
П.Бадарч нь Өмнөговь аймгийн Гурвантэс суманд байрлах хилийн цэргийн ангид хугацаат цэргийн алба хааж байхдаа үлгэр жишээч алба хаагч болж, улмаар бага дэслэгч цолтойгоор улирч байсан юм. Цэргийн албандаа зүтгэх хугацаандаа тэрээр ангидаа клубын зураач, эрхлэгч, соён гэгээрүүлэх тасгийн сурвалжлагч зэрэг үүрэг гүйцэтгэж, олон шилдэг уран бүтээлээ эх орны хилээс эхлүүлжээ.
Түүний “Эх орны хилээс”, “Хилийн тэнгэр цэлмэг байгаасай”, “Застав минь баяртай”, “Нулимст борхон болжмор” зэрэг шүлэг, дуунууд нь хилчдийн сэтгэл зүрхэнд хоногшсон, эх оронч үзэл, хилчин бахархлыг илтгэсэн бүтээлүүд юм.
“Эх орны хил дээр энэ мөчид үүрэг гүйцэтгэж буй мянга мянган хилчдийн нэрийн өмнөөс эрхэм танд урт насалж, удаан жаргахыг хүсэн ерөөе” хэмээн Хил хамгаалах байгууллагын зүгээс мэндчилгээ илэрхийллээ
