Саяхан Монгол Улсын эмэгтэйчүүдийн 3х3 сагсан бөмбөгийн шигшээ баг дэлхийн аваргын тэмцээнд дэд байрыг эзэлж, эх орныхоо нэрийг олон улсад цуурайтууллаа. Энэ бахархам амжилтыг төр засаг өндөрөөр үнэлж, шагналын хур буулгасан нь нийгмийн анхаарлыг ихээр татсан билээ. Гэвч энэхүү шагнал урамшуулал бүх спортын төрөлд, бүх амжилтад тэгш ханддаг уу гэх асуулт олон нийтийн дунд хариулт нэхсээр байна. Тухайлбал, саяхан болсон “Austin Major” хэмээх Counter-Strike төрлийн цахим спортын дэлхийн аварга шалгаруулах тэмцээнд манай “The MongolZ” баг дэд байр эзэлсэн нь Монголын цахим спортын түүхэнд шинэ хуудас нээсэн. Энэ нь зүгээр ч нэг тоглоом биш, дэлхийн олон сая хүнийг хамарсан өрсөлдөөнт, оюун ухааны өндөр түвшний спорт гэдгийг дэлхий нийт хүлээн зөвшөөрсөн. Мөн оюуны спортоор олон улсад гайхамшигтай амжилт үзүүлж буй бяцхан авьяастнуудыг дурдахгүй өнгөрч боломгүй. 8 настай Хүслэн охин дэлхийн математикийн олимпиадад тэргүүн байр эзэлж, Х.Тэргэл хүү 16 хүртэлх насны Дартсын дэлхийн чансааг тэргүүлэн бичигдэж, Бяцхан математикч Элбэгжаргал хүү дэлхийн 25 гаруй орны 500 хүүхэдтэй өрсөлдөж 1-р байр эзэлсэн. Гэвч эдгээр амжилтууд тэгш үнэлэгдэж байна уу гэдэг нийгмийн дунд эргэлзээ төрүүлж буй.
Хүмүүсийн сэтгэлд “Испортын тамирчид, оюуны спортын шилдгүүдийг хэрхэн, юугаар, хэзээ урамшуулж, үнэлэх вэ?” гэсэн асуулт үлдэж байна. Зарим иргэд “төрөөс спортын амжилтыг сонголттойгоор үнэлж, хэн нэгнийг дөвийлгөж, нөгөөг нь орхигдуулж байна” гэж шүүмжилж эхэлсэн нь бодит үнэнтэй ойртож байна. Хэдийгээр багийн болон хувийн гэж ялгаж болох ч гэлээ Улс орныхоо нэрийг дэлхийд дуурсгаж, тугаа мандуулж яваа иргэн бүр, аль ч салбарт бай, ижил тэгш үнэлэгдэх ёстой. Шагнал урамшуулал нь зөвхөн улс төрийн PR хэрэгсэл болж, “Хэнийг, хэзээ, ямар зорилгоор” онцолж буй нь олон нийтийн дунд ялгаварлан гадуурхалтын сэтгэгдэл үлдээж байгаа юм.
Төр, засгийн удирдлагууд гавьяа шагнал гардуулахдаа улстөржилтөөс ангид, бодит амжилтад суурилсан, шударга, ил тод зарчимтай байгаасай хэмээн олон нийт хүсэж байна. Эцэст нь ялгаварлалгүй үнэлгээ нь залуу үеийн итгэл, нийгмийн зөв хандлагын үндэс юм.
