2025 ОНЫ 10 ДУГААР САРЫН 24-НИЙ БААСАН ГАРАГ
УЛСЫН ИХ ХУРЛЫН ХУРАЛДААНААР ТӨСВИЙН ГУРАВ ДАХЬ ХЭЛЭЛЦҮҮЛЭГ, ТҮР ХОРОО БАЙГУУЛАХ АСУУДЛЫГ ХЭЛЭЛЦЭНЭ
Улсын Их Хурлын чуулганы нэгдсэн хуралдаан 2025 оны аравдугаар сарын 24-ний Баасан гарагт Төрийн ордны “Их хуралдай” танхимд өглөөний 10:00 цагаас эхэлнэ. Энэ өдөр хуралдаанаар хэд хэдэн чухал асуудлыг хэлэлцэхээр төлөвлөжээ.
Өглөөний хуралдаанд Монгол Улсын 2026 оны төсвийн тухай хуулийн төсөлтэй хамт өргөн мэдүүлсэн хууль, тогтоолын төслүүдийг хэлэлцэх бөгөөд асуулт, хариулт хоёр цаг үргэлжилнэ. Мөн зарим Байнгын хорооны бүрэлдэхүүнд өөрчлөлт оруулах тухай асуудлыг хэлэлцэнэ. Үүнээс гадна “Монгол Улсын 2026 оны төсвийн хүрээний мэдэгдэл, 2027–2028 оны төсвийн төсөөллийн тухай хуульд өөрчлөлт оруулах тухай” хуулийн төслийн гурав дахь хэлэлцүүлгийг хийхээр төлөвлөсөн байна.
Хуралдааны үргэлжлэлээр 14:00 цагаас “Хянан шалгах түр хороо байгуулах тухай” Улсын Их Хурлын тогтоолын төслийг хэлэлцэнэ. Энэхүү төслийг Улсын Их Хурлын гишүүн Л.Оюун-Эрдэнэ нарын 33 гишүүн 2025 оны аравдугаар сарын 6-ны өдөр өргөн мэдүүлсэн юм. Мөн Үндсэн хуулийн цэцэд хүсэлт гаргах саналын тухай асуудлыг хэлэлцэхээр хуваарьт багтжээ.
Хуралдаануудын дараа Байнгын хороодын санал, дүгнэлтийг нэгтгэн, ирэх долоо хоногт УИХ-ын чуулганы төсвийн гурав дахь хэлэлцүүлгийн хаалтын хуралдаан болох төлөвтэй байна гэж Улсын Их Хурлын Тамгын газраас мэдээллээ.
