Өчигдөр шөнийн УИХ-ын санал хураалтад АН-ынхан оролцсон бол Л.Оюун-Эрдэнэ Ерөнхий сайдаараа үлдэх байжээ. УИХ-д 42 суудалтай тус намынхан Бүлгийнхээ хурал дээр итгэх, итгэхгүй дээр саналын дүн зургаахан хүний зөрүүтэй байсан мэдээлэл байна. 16 гишүүн Ерөнхий сайдыг огцруулах дээр хатуу байр суурьтай байсан бол 26 нь үлдээх дээр санал өгч магадгүй байсан тул Л.Гантөмөр намын даргын зангараг гаргаж АН бүлгээрээ УИХ-ын чуулганы санал хураалтад оролцохгүй байх шийдвэр гаргажээ.
Санал хураалтад оролцсон УИХ-ын 82 гишүүнээс 44 хүний саналаар Ерөнхий сайд огцорсон. Хэрэв АН-ын 20 гаруй гишүүн хуралд ороцсон бол итгэл хүлээлгэхийг дэмжсэн 38 гишүүн дээр тэд нэмэгдэж 50 гаруй хүний саналаар Л.Оюун-Эрдэнэ үлдэх магадлал маш өндөр байжээ.
Ямар сайндаа Ерөнхийлөгч У.Хүрэлсүх яаран сандран чуулганд оролцож, хугацаанаасаа өмнө огцорч байгаа "Хамтарсан" Засгийн газарт харамсал илэрхийлсэн нь улс төрийн энэхүү нөхцөл байдлыг үнэлсэн хэмээн улс төрийн хүрээнд яригдаж байна.
Ямартай ч "Хамтарсан" Засгийн газраас хөөгдсөн ч улс төрийн нүүдлийг ард түмний талд хийсэн АН-ынханд баярлалаа.
Дараагийн улс төр хааш эргэж шинэ Ерөнхий сайдын танхим хэрхэн бүрдэх нь МАН-ын Бага хурлаас шалтгаална.
Өчигдрийн УИХ-ын чуулган дээр УИХ-ын дарга Д.Амарбаясгалангийн хэлсэн үгнээс фокуславал "найзынхаа" талд байж, Ерөнхийлөгчтэй нийлээгүй нь хүн чанарын асуудал байсан. Харин цаашдын улс төрд тухайлбал шинэ Засгийн газар, Ерөнхийлөгчийн сонгуульд үргэлж "хүн чанараар" хандахгүй, цэвэр улс төр хийнэ гэж ажиглагчид харж байна.
Үүнд МАН-ын Засгийн газарт хамтрахгүйгээ нэгэнт мэдэгдсэн АН-ынхны хувьд дараагийн Ерөнхий сайдад яригдаж буй Ерөнхийлөгчийн Тамгын газрын дарга Г.Зандаршатар, ЗГХЭГ-ын дарга Н.Учрал нарын хэнийг нь МАН-ын Бага хурлаас дэмжих нь ялгаагүй. Хэн нь ч болсон МАН-ын Засгийн газрыг нь тогтвортой байлгах эсэх нь цаашид УИХ дахь АН-ынхны мэдэлд үлдлээ. АН-ынхан бодлогоор нэгдэж чадвал хүчтэй гэдгээ сая харуулж чадлаа. БРАВО
