Эмнэлгийн барилгын нээлтийн үйл ажиллагаанд УИХ-ын гишүүн Э.Бат-Амгалан, Ж.Чинбүрэн, Баянзүрх дүүргийн Засаг дарга Г.Жаргалсайхан, дүүргийн менежер Ц.Гомбосүрэн болон 20,33 дугаар хорооны иргэд оролцлоо.
Гачуурт тосгоны эрүүл мэндийн төв нь нийт 25 хүн хэвтэн эмчлүүлэх ортой. Үүнээс гадна сард 65-80 хүнд өдрийн эмчилгээ хийх боломжтой юм. Шүд, уламжлалын чиглэлээр эмчилгээ хийнэ. Ингэснээр 20,33 дугаар хорооны 8000 гаруй иргэд дүүргийн эрүүл мэндийн төвийг зорих шаардлагагүйгээр дэргэдээсээ энэ төрлийн эрүүл мэндийн тусламж, үйлчилгээг авах боломжтой болж байна.
Гачуурт тосгоны эрүүл мэндийн төв алсын дуудлагатай. Өөрөөр хэлбэл 65 км-ийн зайд очиж өвчтөнд эрүүл мэндийн тусламж үзүүлдэг. Мөн зуны дэлгэр цагт иргэд зусландаа гардаг бөгөөд энэ тоог нэмбэл ойролцоогоор 10 мянга гаруй хүнд үйлчилдэг. Шинэ эмнэлэг нээгдсэнээр эдгээр иргэдэд хүрэх эрүүл мэндийн тусламж, үйлчилгээний чанар хүртээмж сайжирна. Мөн дүүрэг, орон нутгаас шаардлагатай эмнэлгийн хэрэгсэл, үйлчлүүлэгчийн зөөлөн эдлэл, зориулалтын ороор хангахаар болсон гэж Баянзүрх дүүргээс мэдээллээ.
