“Засгийн газрыг огцруулах жагсаалыг П.Цагаан болон түүний хүү, мөн Дотоодын цэргийн командлагч Р.Чингис, түүний дүү Р.Саруул нар санхүүжүүлж байгаа” хэмээн Щрөнхий сайд Л.Оюун-Эрдэнийн мэдэгдэлд дурдагдсан Р.Саруул цахим хуудсаараа дамжуулан мэдэгдэл гаргажээ.
Уг мэдэгдэлд, Монгол Улсын Ерөнхий сайд Л.Оюун-Эрдэнэ өнөөдрөөс яг 7 хоногийн өмнө буюу 2025 оны 01 дүгээр сарын 07-ны өдөр хэвлэлд өгсөн ярилцлагадаа
"...Дотоодын цэргийн командлагч (угтаа бол штабын дарга) Чингис болон түүний дүү Саруул энэ жагсаалтай холбоотой асуудлыг санхүүжүүлж байгаа..." гэж ИЛТЭД ХУДАЛ мэдээллээр нийтэд сөрөг ойлголт төрүүлэн ТӨР, АРД ТҮМНИЙ ЭСРЭГ үйлдэл хийсэн мэтээр ойлгуулж миний ахын болон миний нэр төр, алдар хүндэд халдсан үйлдэл гаргалаа!
Манай гэр бүл үе удам дамжин хууль сахиулах байгууллагын тусгай мэргэжил эзэмшиж, тангараг өргөн алба хааж байсны хувьд Эх орон, төр, ард түмнийхээ эсрэг гадаад, дотоодоос санхүүжилт авч жагсаал цуглаан санхүүжүүлүүлэх нь бүү хэл ТИЙМ ӨЧҮҮХЭН НЭГЭН БОДОЛ ч ТЭЭХГҮЙ гэдгийг хариуцлагатайгаар хэлье!
Монгол Улсын Үндсэн хууль болон бусад хуулийн биелэлтийг хангах бүрэн эрх, чиг үүргийг хуулиар хүлээсэн Засгийн газрыг удирддаг Ерөнхий сайдын энэхүү дэндүү хариуцлагагүй худал мэдэгдэл нь ИРГЭДИЙНХЭЭ ҮНДСЭН ХУУЛИАР ХАМГААЛАГДСАН НЭР ТӨР, АЛДАР ХҮНДЭД ХАЛДАЖ БУЙ ОВИЛГОГҮЙ ҮЙЛДЭЛ агаад үүнтэй холбоотой асуудлаар хууль-шүүхийн байгууллагад хандаж нэр төрөө цэвэрлэн сэргээлгэхийг үүгээр мэдэгдье! гэжээ.
