УИХ дахь Ардчилсан намын бүлгийн хурал үргэлжилж байна. Хэлэлцэж буй асуудалтай холбоотойгоор намын бүлгийн гишүүд сэтгүүлчдэд мэдээлэл хийлээ.
УИХ-ын гишүүн П.Сайнзориг, Н.Батсүмбэрэл нар УИХ-ын дарга Д.Амарбаясгаланд Монгол Улсад хөдөлмөр эрхлэх гадаад ажилтны тоо, хувь хэмжээ тогтоохгүй байх, ажлын байрны төлбөрөөс чөлөөлөх тухай хуулийн төслийг энэ сарын 19-ний өдөр өргөн барьсан. Гэвч хуулийн төслөө татан авч буй тухайгаа хууль санаачлагчид өнөөдөр мэдээлсэн.
Энэ талаар УИХ-ын гишүүн С.Цэнгүүн “Айсан хүнд аргал хөдөлнө гэгчээр асуудлыг бодит байдлаас нь холдуулаад “Хятадын дарангуйлал ирэх гэж байна” гэх мэт гүтгэлэг тарааж, олон нийтийг турхирах нөхцөл үүсгэж буй нь байж боломгүй үйлдэл юм. Цахилгаан станц барих юм бол Монголд China town бий болно гэж дайрсаар байгаад энэ төслүүдээ гацааж байсан. Харийн дарангуйлал орж ирэх гээд байна гэх айдаст автуулж байгаад төслөө гацаадаг жишиг байсаар байна. Ингэж гацаасан хүмүүс өнөөдөр ч Төрийн ордонд, УИХ-д бий.
Бид попролоор улсаа удирдуулаад байж болохгүй. Монгол Улс хөгжих ёстой, том төслүүд урагшлах ёстой. Монголд бодит нөхцөл байдлыг хэлэхээс, дуугарахаас айхаа байсан эрүүл ухаантай хүмүүс олон байдаг. Бид реформуудаа зоригтойгоор хөдөлгөөд явна” гэлээ.
