УИХ дахь АН-ын бүлэг өнөөдөр хуралдлаа. Хуралдаанаар хэлэлцсэн асуудлын талаар АН-ын бүлгийнхэн мэдээлэл хийлээ.
АН-ын бүлгийн дарга О.Цогтгэрэл "Бүлгийн хурлаар гурван асуудал хэлэлцлээ. Улаанбаатар хотын түгжрэлийг бууруулах 20 минутын хот бодлогын хүрээнд авч хэрэгжүүлж байгаа үйл ажиллагааны мэдээлэл сонслоо.
Эдийн засаг талаасаа Улаанбаатар хотын түгжрэл 3.6 их наяд төгрөгийн хохирол үзүүлж байгаа талаар мэдээлэл өгсөн. Үүнийг арилгахын тулд олон ажил төлөвлөсөн байна. Гэхдээ эргээд төлөх нөхцөл зэргээ сайн тооцохгүй байх шиг байна.
Хоёрдугаарт, Төсвийн хоригтой холбоотойгоор 2025 оны төсвийг дахин өргөн барьж хэлэлцэхэд дэгийн асуудал үүсэж байгаа. Тиймээс Засгийн газраас УИХ-д хуулийн төсөл өргөн мэдүүлж байна. Хэлэлцүүлэгтэй холбоотой Сангийн сайдын мэдээллийг сонссон.
Ерөнхийлөгч төсөвт хориг тавихдаа алдагдалгүй төсөв батлах шаардлагыг тавьсан. Сангийн сайд 1.9 их наяд төгрөгийг танахын тулд бодитоор 2.4 их наяд төгрөг хэмнэх шаардлага үүссэн тухай танилцуулж байна. 2.4 их наяд төгрөг бол асар их мөнгө. Засгийн газраас дахин өргөн барих гарц хайсан нь зөв гэж үзэж байгаа.
Гуравдугаарт, Чөлөөлт зах зээлийг хөгжүүлж хувийн өмч, эдийн засгийн эрх чөлөөг хамгаалах тухай тогтоолын төслийг өргөн мэдүүлэхээр тогтлоо. Хувийн өмчийг төрөөс дур мэдэн хураах, дайчлах, бусдад этгээд халдан түрэмгийлэх байдлыг таслан зогсоохын тулд тогтоолын төсөл боловсруулахаар болсон.
Төрөөс олгосон зөвшөөрөл, лиценз, гэрчилгээний баталгаа болон зөвшөөрөл эзэмшигчийн өмнө хүлээх үүргийг тодорхой болгох хуулийн төслийг боловсруулж, УИХ-д өргөн мэдүүлэхийг Засгийн газарт даалгана" гэлээ.
