Жагсаалтаар УИХ-д орсон гишүүдийн хувьд хэцүүхэн долоо хоног болж өнгөрлөө. Хамгийн сүүлийн сенсацаас эхэлбэл жагсаалтын гишүүн Нарантуяа буюу Нарагийн хувьд улс төрийн амьдрал нь тунчиг адармаатай үргэлжилж харагдана.
Цахим хаягаараа бараа сурталчлан, УИХ-ын даргын зөвшөөрөлгүй гадаадад зугаалсан, чуулганы хурал 1 удаа тасалсан гээд л шинэхэн байгуулагдсан УИХ-ын Ёс зүй, дэгийн байнгын хороо нойрноосоо гэнэт сэрэв үү гэлтэй гайхалтай шуурхай ажиллаж биднийг гайхшируулсан. Тус шуугиан намдаж шүлс нь дөнгөж хатав уу гэтэл дахин нэг шуугиан тарьлаа.
Хуруугаа уншуулчхаад хурлаа өрөөнөөсөө үзэж суугаа эрхэм гишүүдийн чихийг хатуухан татаад зогсохгүй намын даргаа ч мартсангүй. Уг үйлдэлд Батбаатар дарга нь гоморхож тунив уу эсвэл хорхойтой араандаа зуучхав уу амралтын өдрөөр ИЗНН-ын Үндэсний хороо дүрмийн бусаар яаралтай хуралдаж ирц дутуу хэдий ч дэд даргын суудлаа яаран яаран буцаан авлаа. Ганц Нарагийн бус бусад 8 дэд даргаа ч хоморголон огцруулжээ.
Жагсаалтын ачаар улс төрд дөнгөж хөл тавьж буй Нара гишүүний хувьд алдаа оноо бий ч, авах дэмжих юм ч байна.
Төр түшилцэх төрийн түшээ болсноосоо хойш хойш эх хүүхдийн эрүүл мэндийн төвөөс эхлээд гишүүдийн ирцийн асуудал мөн намын даргынхаа санхүүгийн тайланг нэхэх гээд түүнд буруу дугарсан үг уул нь тун цөөн мэт. Үнэн үг хэлсэн хүнд үхэр өшөөтэй гэдэг шиг ах дүүгийн нам болсон ИЗНН-ын дарга нь дэд даргадаа гомдвол өлхөн огцруулж чаддаг юм байна.
Харин дахиад дургүйг нь хүргэвэл намын дэд даргаа буцаан авсан шигээ УИХ дахь “жагсаалтын” гишүүнээ эргүүлэн татаж чадах уу?
Харамсалтай нь жагсаалтын гишүүнийг улс төрийн нам эвслүүд нь эгүүлэн татах хуулийн заалт байхгүй. УИХ-ын Дэгийн тухай хуульд өөрчлөлт оруулж ёс зүйгүй болон хариуцлага алдсан гишүүдийг хугацаанаас нь өмнө эргүүлэн татах хуулийг С.Эрдэнэ 2019 онд УИХ-ын гишүүн байхдаа санаачлан өргөн барьж байжээ. Гэвч батлагдаагүй.
Хэрэв энэ хуулийг дэмжиж хэрэгжүүлсэн бол хурдан түргэн ам хэлтэй Нара болон оюутнуудыг хөдөө, хотоор нь ялгаварладаг, хүний эрхийн мэдрэмжгүй Саранчулуун гээд улс төрд дөнгөж хөлд тавьсан жагсаалтын гишүүдээс эхлээд ганц ч жил бололгүй дараагийн хүндээ УИХ-ын эрхэм гишүүний суудлаа эгүүлэн өгөх хүмүүс энэ парламентад хэд хэд бий.
Дэлгэрэнгүй видеог
