“Монгол, Хятадын Замын-Үүд, Эрээний эдийн засгийн хамтын ажиллагааны бүс байгуулах тухай” Монгол Улс, БНХАУ-ын Засгийн газар хоорондын хэлэлцээртэй холбоотойгоор Шадар сайд С.Амарсайхан уг эдийн засгийн хамтын ажиллагааны бүс байгуулах ажлыг эрчимжүүлэх чиглэлийг холбогдох албаныханд өгсөн.
Үүний дагуу Шадар сайдын ахлах зөвлөх бөгөөд Ажлын албаны дарга, Хамтарсан гүйцэтгэх зөвлөлийн Монголын талын дарга Б.Мөнх-Оргил болон холбогдох албаныхан БНХАУ-ын ӨМӨЗО-ы Хөх хотод ажиллалаа.
Албан томилолтын хүрээнд БНХАУ-ын ӨМӨЗО-ны дэд тэргүүлэгч, Хамтарсан гүйцэтгэх зөвлөлийн Хятадын талын дарга Ян Жинь тэргүүтэй төлөөлөгчидтэй уулзаж, Хамтарсан гүйцэтгэх зөвлөлийн анхдугаар хуралдааныг хийн, дараах асуудлаар санал солилцож, протоколд гарын үсэг зурлаа.
Үүнд, Монгол Улс, БНХАУ-ын Засгийн газар хооронд байгуулсан хэлэлцээрт заасны дагуу Хамтын ажиллагааны бүсийн хамтарсан хөгжлийн ерөнхий төлөвлөгөөний төсөл, Хамтын ажиллагааны бүсийг хооронд нь хил дамнасан авто замын байгууламжаар холбох, улсын хилийг огтлон гарах цэгийн байршлыг тус тус энэ онд багтаан тогтоохоор боллоо.
Эдийн засгийн хамтын ажиллагааны бүсийг нээх бэлтгэл ажлын хүрээнд холбогдох хил хяналтын байгууллагууд харилцан уялдаатай нягт хамтран ажиллахаар талууд санал нэгдлээ.
Эдийн засгийн хамтын ажиллагааны бүсийн Хамтарсан гүйцэтгэх зөвлөлийн хурлыг жилд нэгээс доошгүй удаа зохион байгуулахаар тогтлоо.
Ингэснээр Монгол Улс, БНХАУ хооронд худалдаа, эдийн засгийн хамтын ажиллагаа хөгжиж, транзит тээвэр болон аялал жуулчлал, үйлдвэр үйлчилгээ зэрэг нэмүү өртөг шингэсэн бүтээгдэхүүн үйлдвэрлэж экспортлох, мөн гурван талын эдийн засгийн коридорийг хөгжүүлэх, Евро-Азийн орнуудтай хамтын ажиллагааг өргөжүүлэх, хил орчмын хамтын ажиллагааг хөгжлийн шинэ түвшинд гаргах боломжийг бүрдүүлэх томоохон алхам болж байгаа юм.
