Монголбанкны Хяналтын зөвлөлийн ээлжит хурал 2026 оны есдүгээр сарын 29-ний өдөр боллоо. Хурлаар Монгол Улсын Их Хурлаас баталсан Монголбанкны Хяналтын зөвлөлийн ажиллах журамд заасан чиг үүрэг, бүрэн эрхийн хүрээнд хууль, эрх зүйн орчны хэрэгжилт, Монголбанкны дунд хугацааны стратеги, дотоод хяналт шалгалт болон хөндлөнгийн аудиттай холбоотой асуудлуудыг хэлэлцэв.
Хяналтын зөвлөлийн гишүүд Төв банк (Монголбанк)-ны тухай хуулийн хэрэгжилт, үр дагаварт хийж буй үнэлгээнд тусгах санал, анхаарах асуудал болон холбогдох зохицуулалтын хэрэгжилт, үр нөлөөний талаар санал солилцлоо. Мөн Монголбанкны 2026–2030 оны дунд хугацааны стратеги төлөвлөгөө, түүний тэргүүлэх чиглэл, зорилго, зорилт, хэрэгжүүлэх арга хэмжээтэй танилцаж, стратегийн хэрэгжилтэд анхаарах асуудлуудыг ярилцлаа. Үүний зэрэгцээ дотоод хяналт шалгалтын 2026 оны эхний хагас жилийн тайланг хэлэлцэж, тайлант хугацаанд хэрэгжүүлсэн ажил, хяналт шалгалтын үр дүн болон цаашид анхаарах асуудлуудын талаар санал солилцлоо.
Түүнчлэн Монголбанкны жилийн санхүүгийн тайланд хөндлөнгийн аудит хийх байгууллагыг сонгон шалгаруулах ажлын явцтай танилцаж, сонгон шалгаруулалтын үйл ажиллагаанд хяналт тавих чиг үүргийнхээ хүрээнд холбогдох асуудлуудыг хэлэлцэв. Хурлын төгсгөлд Хяналтын зөвлөлийн дотоод үйл ажиллагаатай холбоотой бусад асуудлыг хэлэлцэж, холбогдох арга хэмжээг авч хэрэгжүүлэхээр тогтлоо.
