Астана хотын Эдийн засгийн тусгай бүсэд барилга угсралт, эмнэлэг, сургуулийн тавилга, тоног төхөөрөмжийн үйлдвэрлэл явуулж буй “ATM Construction & Investment” үйлдвэрт ажиллалаа. Энэ үйлдвэр бол Эдийн засгийн тусгай бүсэд олон төрлийн үйлдвэрлэлийг нэг цогцолборт төвлөрүүлж, улсынхаа импортын хамаарлыг бууруулж буй томоохон жишиг болж байна.
Астана хотын Эдийн засгийн тусгай бүсэд үйлдвэрлэл эрхлэхэд 25 хүртэлх жилийн хугацаанд:
- Газрын татвар 0 хувь
- НӨАТ 0 хувь
- Үл хөдлөх хөрөнгийн татвар 0 хувь
- Газар ашиглалтын төлбөр 0 хувь.
Мөн тусгай бүсэд импортолсон түүхий эд, тоног төхөөрөмжийн гаалийн албан татвараас чөлөөлж байна.
Манай Засгийн газраас Эдийн засгийн тусгай бүсийн тухай хуулийн төслийг боловсруулж, энэ намрын чуулганаар УИХ-д өргөн мэдүүлэхээр бэлтгэж байна. Хоёр орны худалдаа, эдийн засгийн хамтын ажиллагааг хөгжүүлэхэд уг хууль чухал үүрэг гүйцэтгэнэ.
Хуулийн төслөөр хөрөнгө оруулагчдад газар болон татварын таатай нөхцөлийг бүрдүүлнэ. Ингэснээр дотоодод үйлдвэрлэх боломжгүй бараа бүтээгдэхүүний үйлдвэрлэл болон дотоодын хүнс, хөдөө аж ахуйн экспортыг дэмжих юм.
Астана хотын эдийн засгийн бүсэд метал бус эрдэс бүтээгдэхүүн, машин механизм, тоног төхөөрөмж, гэр ахуйн цахилгаан хэрэгсэл, хүнс, хуванцар бүтээгдэхүүн, химийн бүтээгдэхүүн, төмөр замын зүтгүүр, нисэх онгоц болон сансрын хөлөг гэх мэт 20 орчим үйлдвэрлэл явуулж байна.
