Эрүүл мэндийн салбар дахь цахимжилт болон эмнэлгийн тусламж үйлчилгээний системд хийгдэж буй шинэчлэлийн талаар Эрүүл мэндийн сайд Э.Батшугар мэдээлэл өглөө.
Тэрбээр "13А" маягтыг цуцлахаас илүүтэй цахим хэлбэрт шилжүүлж буйг онцлоод практик дээр өрхийн болон лавлагаа шатны эмнэлгүүдийн мэдээллийн технологийн систем, програм хангамж хоорондоо зөрүүтэй, хөгжүүлэлтийн түвшин адилгүй байгаа зэрэг хүндрэлүүд гарчээ. 2023 онд 13А маягтыг цахимжуулсан ч зарим эмнэлгүүд системээ цааш нь хөгжүүлэлгүй хуучин хэвээр нь үлдээснээс болж саатал үүссэн тул сургалт явуулах, системүүдийг нэгтгэх зорилгоор түр хойшлуулаад байгаа юм байна.
2027 оны 1 дүгээр сарын 1-нээс шинэ систем бүрэн нэвтэрнэ
Эрүүл мэндийн салбарын мэдээлэл солилцооны системийг олон улсын стандарт болох FHIR (Fast Healthcare Interoperability Resources) болон SNOMED CT системд нийцүүлэн хөгжүүлж байна. Энэхүү систем бүрэн нэвтэрснээр:
Мэдээллийн шууд солилцоо: Эмнэлгүүд хоорондоо өвчтөний цахим карт, өвчний түүхийн мэдээллийг түргэн шуурхай солилцох боломж бүрдэнэ.
Гадаад улсаас мэдээлэл татах: Монгол иргэн гадаадад эмнэлгийн тусламж авахад өвчний түүхийг нь эх орноос нь шууд цахимаар татах, мөн гадаадын иргэн Монголд тусламж авахад эх орноос нь мэдээллийг нь татан авах боломжтой болно.
Сайд Э.Батшугарын мэдээлснээр, уг системүүдийг хөгжүүлэх ажил нэлээд ахицтай байгаа бөгөөд 2027 оны нэгдүгээр сарын 1-ний өдөр гэхэд салбарын цахимжилтыг өндөр түвшинд хүргэж, ашиглалтад оруулахаар шахаж ажиллаж байна.
