"Усан парк"-ын талбайд 25 давхар орон сууц барьж байгаа юу?

2017 оны 6 сард дэлхийн стандартад нийцсэн, жилийн дөрвөн улиралд ажиллах усан паркийн барилгын ажил эхлүүлэн гэсэн мэдээлэл мэдээллийн хэрэгслээр их явсан.  Гэвч 5 жилийн хугацаанд барилгын  ажил явагдаагүй. Харин энэ жилээс л барилгын ажил эхэлсэн. Харамсалтай нь усан парк биш 25 давхар орон сууцны ажил явагдаж байгаа талаар албан бус мэдээлэл байгаа юм. Энэхүү усан паркийн барилгын ажлыг  анх Вашингтон  Минесота, Торонто зэрэг дэлхийн томоохон хотуудын жишигт нийцсэн битүү усан паркийн технологийг Монголд нэвтрүүлнэ хэмээн энэхүү төслийг хэрэгжүүлэгч Барилга үйлдвэрлэл технологи интерьер /БҮТИ/, М&G construction компани болон  SHONKHOR project-ийнхэн сурталчилсан байдаг юм. 

Энэхүү усан парк нь хотын төв болох  Энхтайвны гүүрний зүүн тал, Замын цагдаагийн урд, төмөр замын гарц хооронд байрлах 11,8 га талбайг эзэлж байгаа юм. Усан парк нь ресторан, зочид буудал, кино театр,  үзвэр үйлчилгээ болон олон орны хоолны газар зэрэг бүх насныханд зориулсан цогц амралтын хүрээлэн болохоор төлөвлөгдөж байсан юм. Түүнчлэн 600 гаруй ажлын байр шинээр бий болно. Энэ нь найрсаг Улаанбаатар хөтөлбөрийн хүрээнд хэрэгжиж буй бөгөөд Улаанбаатар хотын шинэ удирдлагын мөрийн хөтөлбөр, Барилга хот байгуулалтыг яам, БОАЖЯ хамтран ажиллаж байсан төслийн барилга байсан. Гэсэн хэдий ч иргэд цахим орчинд орон сууцны барилга баригдаж байна гэсэн мэдээллийг өгөөд байгаа юм. 

Фокус.мн сурвалжлах баг тухайн барилгын талбай дээрх харуул хамгаалалтын ажил хийж буй  "Бүти" компанийн лого бүхий хувцастай харуулаас тодруулга мэдээлэл авахыг оролдсон. Гэвч мэдээлэл өгөхөөс татгалзан, барилгын хашаанаас холдохыг шаардсан. Барилгын хашаанаас гарч ирсэн иргэнээс асуухад "25 давхар орон сууцны барилга баригдаж байгаа, хажууд нь усан паркийн ажил явагдана гэж байсан. Энэ талаар тодорхой мэдэхгүй байна" хэмээн ярьсан.

Нийгмийн хариуцлага, иргэдийн сайн сайхны төлөөх гэсэн сайхан  уриа сурталчилгаатайгаар эхэлсэн энэхүү төслийг газар дээр нь сурвалжилахад төслийн анхны зорилгоосоо ийнхүү хазайжээ. Иймэрхүү сайхан нэрээр эхэлсэн төслүүд эцэст нь орон сууцны барилга болж ашгийн төлөөх бизнес болсон жишээ олон бий.  "Усан парк" гэх гоё төсөл ийнхүү тэдний араас орж байгаа бололтой. Тиймээс фокус.мн үргэлжлүүлэн судалж, цаашид баримттай мэдээллүүдийг цувралаар хүргэх болно.