Хууль зүй, дотоод хэргийн сайд С.Амарсайхан өнөөдөр /2026.05.21/ Хил хамгаалах Ерөнхий газарт ажиллаж, Хууль зүйн салбар, Хил хамгаалалтын өнөөгийн нөхцөл байдал, дэвшүүлсэн зорилго зорилт, цаашид хэрэгжүүлэх бодлогоо танилцууллаа.
Хууль зүй, дотоод хэргийн салбарт “Иргэн төвтэй эрх зүйн реформ”-ыг хэрэгжүүлнэ. Энэ бодлогын хүрээнд Хил хамгаалалтын эрх зүйн орчиныг сайжруулж, хилийн цэргийн байгуулалтыг бэхжүүлэхэд анхаарч, “Бүсийн хилийн албыг удирдах газар”-ыг байгуулахаар ажиллаж байна.
Монгол Улс, Оросын Холбооны Улсын хилийг 2 дахь удаа хамтран шалгах ажлын явц 80 гаруй хувьтай хэрэгжиж байгаа бол Монгол Улс, Бүгд Найрамдах Хятад Ард Улсын хилийг 3 дахь удаагаа хамтран шалгах ажлыг эхлүүлсэн.
Улсын хилийг хамтран шалгах түүхэн, хариуцлагатай ажлыг хийж гүйцэтгэхэд Монгол Улсын засгийн газар болон Хууль зүй, дотоод хэргийн яам бүх талаар дэмжиж, анхаарч ажиллана гэдгээ илэрхийллээ.
Хил хамгаалах байгууллага бол төрийн сахилга бат, цэргийн дэг журам, хариуцлагын хамгийн өндөр СТАНДАРТ мөрдөгдөх ёстой тусгай алба. Хил хамгаалалт зөвхөн хүний нөөцөөр хэмжигдэхгүй учир эх орны нүүр царай болсон хилийн шалган нэвтрүүлэх албаны бие бүрэлдэхүүний мэдлэг, ур чадвар, алба хаах нөхцөлийг сайжруулах, үйл ажиллагааг олон улсын жишигт хүргэж СТАНДАРТЫГ ШИНЭЧЛЭХ бодлого баримталж байна.
Түүнчлэн хиймэл оюун, их өгөгдөлд суурилсан орчин үеийн дэвшилтэт техник, технологи, программ хангамжийг нэвтрүүлж, хилийн боомтын аюулгүй байдлыг хангаж, цахим гарцыг нэмэгдүүлэх чиглэлд анхаарч ажиллах болно.
Эх орныхоо дархан хилийн энхийн манаанд мянга мянган хилчид өөрийн залуу нас, хөдөлмөр зүтгэлээ зориулан ажиллаж байгаа. Хууль зүй, дотоод хэргийн сайдын хувьд хил хамгаалах салбарт ажиллаж буй ажилтан албан хаагчдын нийгмийн баталгааг сайжруулах, цалин хангамжийг үе шаттай нэмэгдүүлэх, “Хилийн тэнгэр” 1054 айлын орон сууцны хотхон, хилийн заставын “Шинэ эрин-ногоон хөгжил” 1208 айлын орон сууцны төслийг эрчимжүүлж 850 хилчнийг ипотекийн зээлд хамруулж, төсвийн зохицуулалтыг хийж, хөрөнгө оруулалтыг жил бүрийн улсын төсөвт тусгуулахад анхаарч байна.
Цэргийн алба бол төрийн тусгай алба тул цэргийн дүрмээр тогтоосон сахилга, дэг журмыг ягштал мөрдөх учиртай. Иймд цэргийн алба хаагчдын дүрмийн бус харилцаа, хүний эрхийн зөрчлийг таслан зогсоож, алба хаагчдын амь нас, эрүүл мэндтэй холбоотой эрсдэл, осол, зөрчил гаргахгүй байхад бүх талаар онцгой анхаарч ажиллахыг хил хамгаалах байгууллагын нийт бие бүрэлдэхүүнд үүрэг болголоо.
Төрийн дүрэмт хувцас, цэргийн цол бол давуу эрх биш, өндөр хариуцлага юм. Иймд албан тушаалаа урвуулан ашиглах, хууль зөрчих, эрх мэдлээ хэтрүүлэх асуудалтай эвлэрэхгүй, хатуу хариуцлага тооцож ажиллана гэдгээ анхаарууллаа.
Сэтгэгдэл (0)
Сэтгэгдэл бичигдээгүй байна