Эв нэгдэл, баяр ёслолтойгоор албан ёсны шинэ даргатай болсон АН-ынхан цэгцрэх алхмаа хийсэн.
Харин эрх баригч МАН-ынхан шинэ Ерөнхий сайдтай болсон ч намын даргатай ч юм шиг, үгүй ч юм шиг 3-4 сар болж байна. Намын дүрэм, улстөрчийн ёс зүйгээр бол Ерөнхий сайдаасаа огцорсон бол намын даргаа, намын даргаасаа огцорсон бол Ерөнхий сайдаа үг дуугүй “автоматаар” хүлээлгэн өгөх ёстой. Харамсалтай нь энэ соёл хамгийн сайн төлөвшсөн байх ёстой зуугаар хэмжигдэх жилийн түүхтэй МАН-д улс төрийн тохиролцоо гэх бохир улстөр нь ёс зүйгээс давснаас тодорхойгүй байдалтайгаар хагас жил үргэлжлэх төлөвтэй болоод байна.
Тохиролцоо, тохироо, наймаагүйгээр улс төрийн ямар ч ажил хөдлөхгүй болсон. Ялангуяа МАН болон АН-ын хувьд нам доторх фракцуудын дунд болдог байсан тохиролцоо сүүлийн үед нам дотроосоо хальж гадагшаа бусад нам болон улс төрчидтэй тохирдог, наймаалцдаг болсон.
Монголын улс төрийн тогтолцоонд гажуудал үүсгэж буй энэхүү эхлэлийг Монгол Улсын Ерөнхийлөгч У.Хүрэлсүх тавиад байна хэмээн ажиглагчид үзэж байна. Түүний бүрэн эрхийн хугацаа дуусч буй. Үндсэн хуулийн өөрчлөлтөөр У.Хүрэлсүх дахин нэр дэвших эрхгүй. Энэ нь түүнийг Ерөнхийлөгч байх хугацаандаа Монголын улс төрд нөлөөллөө бэхжүүлж улс төрд буцан орох замаа засахын тулд МАН-ын эрх мэдэлд гар дүрч эхэлснээс харж болохоор байна.
АН-ын даргаар сонгогдсон О.Цогтгэрэлийг Ерөнхийлөгч У.Хүрэлсүхийн тохироогоор санасандаа хүрсэн гэх яриа улс төрийн хүрээнд яригдаж буй нь зүгээр нэг тохиолдлын хов биш юм. МАН-ын дарга болон Ерөнхий нарийн бичгийн даргаар түүний баруун гар, итгэлт андууд очиж бас очихоор яригдаж буй зэрэг нь МАН-ын гишүүдийн сонголт биш нь үнэн билээ.
Үе үеийн экс Ерөнхийлөгч нар нэр дэвшүүлсэн нам болон улс төрийн эрх мэдлээсээ зуурсаар зууралдсаар байдгийн тод жишээ бол Ц.Элбэгдорж, Х.Баттулга, Н.Энхбаяр нар. Эцэст нь тэд намдаа болон улстөрд ч үзэн ядагдаж улс төрийн карьертаа цэг тавьж ард түмний хүндэтгэлийг ч алдсан түүхтэй. Энэ эмгэнэлтэй түүхийг Монгол Улсын долоо дахь Ерөнхийлөгч У.Хүрэлсүх давтаж эхлэв бололтой.
Гэхдээ хамгийн харамсалтай нь сүүлийн найман жил ялалтаараа аархаж, ядаж ойрын 10 жилээр улс орны хөгжлийн бодлогыг төлөвлөн явж байсан эрх баригч намын дотоод асуудалд ил цагаан оролцож эхэлснээр ганц МАН-ыг биш Монголыг талцуулж, улс төрийн тогтолцоог гажуудалд оруулаад байна.
АН-ынхан Женкогийн оролцооноос салах гэж олон жил зовсон. Хүкийн ачаар арай гэж холдууллаа. Харин одоо АН-ын зовлон МАН-д ирж, зургаан жил улс төрийн гал тогоогоо үгүйлсэн ХҮК гэх хүний эрх мэдлийн төлөөх “тохироонд” МАН-аа алдах уу, аврах уу?
Сэтгэгдэл (2)