Майкл Дуглас, Кэтрийн Кета-Жонс нарын урт удаан хайрын түүх

25 насны зөрүүтэй Холливудын алдарт хос Майкл Дуглас, Кэтрин Зета Жонс нар гэр бүл болоод 20 гаруй жил болжээ. Тэднийг анх нийлэхэд хүмүүс ганц хоёр жилээс хэтрэхгүй гэцгээж байлаа. Майкл Дугласын олон эмэгтэйчүүдтэй холбогддог, хүүхэмсэг зан болон тэдний олон насны зөрүү ийн шуугихад нөлөөлсөн юм.

Анх тэднийг нэр холбогдож эхлэх үед Майкл Дуглас 56 настай. Харин жүжигчин бүсгүй 27-той байжээ. Тухайн үед Дуглас нэг хүүтэй эхнэртэйгээ 23 жил ханилсан. Бас “Бэлгийн хамаарал” хэмээх оноштой, эхнэрээ байнга араар тавигч нэгэн байв.

Харин Кэтрин Уэльс хотын унаган иргэн. Оёдолчин ба амттан үйлдвэрлэгчийн охин. 1989 онд Дугласын тоглосон “Роузын дайн” кино дэлгэцнээ гарч байхад тачаангуй эрийг харах гэж өдөрт 2 удаа кино театр руу гүйдэг байснаа Кэтрин дурсдаг. Гэтэл 10 жилийн дараа нөхцөл байдал яг эсрэгээр давтагджээ. Майкл Дуглас түүнийг “The Mask of Zorro” киноноос хараад шууд дурласан гэнэ.

1999 оны 12-р сарын 31-нд Майкл Дуглас Кэтринд гэрлэх санал тавьсан боловч татгалзсан хариу авчээ. Ухаанаа алдтал дурласан Дуглас аль болох хурдан гэрлэхийг хүсч байв. Харин Кэтрин эхнэртэй хүнтэй холбогдохыг хүсээгүй байна. Майкл гэр бүл цуцлах асуудлаа нилээд хурдан шийдсэн. Тэр эхнэрийнхээ тавьсан бүх болзлыг зөвшөөрч 60 сая долларыг түүнд өгч байж салжээ.

Майкл удалгүй голдоо 10 каратын бриллианттай, тойруулан жижигхэн алмааз шигтгэсэн гайхалтай сүйн бөгж худалдан авч хайртай бүсгүйдээ дахин гэрлэх санал тавив. Кэтрин тэр үед ч гэсэн татгалзжээ. Тухайн үед Кэтрийн анхны хүүхдээ тээж байлаа. Гэсэн ч Дугласын муу нэрээс айж байв. Тэр бол Холливудын хамгийн засаршгүй хүүхэмсэг нэгэн. Хүүхэн эргүүлэх донгоосоо болж эрхэм харилцаагаа ч сүйтгэж мэдэх хүн байлаа. Эцсийн бүлэгт Кэтрин хуримын гэрээндээ нэг заалт оруулсны дараа түүнтэй гэрлэхийг зөвшөөрчээ. Араар тавьж баригдсан тохиолдол болгонд нөхөр нь 5 сая долларыг түүнд төлнө. Энэхүү арга хэмжээ ямар ч сэтгэл зүйн эмчилгээнээс илүү тусаа өгч хосууд 20 жилийн турш “торгуульгүй” амьдарч байна.

Дуглас Кэтринтэй гэрлээд олон зүйл өөрчлөгджээ. Майкл Дуглас хэлэхдээ “Би аав хүн ямар байх ёстойг жинхэнэ утгаар нь ойлгосон. Өмнө ажил, карьераа урьтал болгодог байсан бол одоо гэр бүл, үр хүүхдүүдээ түрүүнд тавьдаг болсон” гэжээ. Тэрээр эхний гэрлэлтээс төрсөн хүү Кэмероны хүмүүжилд завгүй ажлын хуваариас болоод нэг их оролцоогүй. Хүүгээ хориотой бодист донтож хар тамхины хэргээр ял авахад Дуглас зөвхөн өөрийгөө буруутгасан. 2016 онд түүний том хүү шоронгоос гарч, амьдралаа өөрчлөхөөр хатуу шийдсэн байв. Кэмерон нэгэн бүсгүйтэй учирч охин төрүүлснээр Майкл өвөө болсон юм. Майкл, Кэтрин хоёр түүнээс нүүр буруулж шоронд хаяагүй. Харин ч хүнд өдрүүдийнх нь аврал болжээ.

Майкл эхнэрээ бүхий л талаас нь дэмждэг. “Гэр бүлийнхээ төлөө ажлын саналаас татгалзах хэрэггүй. Асч дүрэлзэж буй үедээ ажилла” гэж байнга хэлдэг байв. Тэр эхнэрээ амжилттай явах бүхий л боломжийг бүрдүүлсэн. Ах дүү Коэний найруулсан “Intolerable Cruelty”, Стивен Содербергийн “Ocean’s Twelve” зэрэг кинонуудад тоглож орчин үеийн хамгийн хурц тод жүжигчин гэсэн байр суурьтай болжээ. Харин “Чикаго” мюзиклийн гэмт хэрэгтэн Велмагийн дүр түүнд “Оскар” авч ирсэн юм. Мэдээж Кэтрин нөхрийнхөө дэмжлэггүй ийм олон кинонд тоглоход хэцүү байх байсан. “Гэргий маань авьяас билгээ дайчилж байр сууриа олох ёстой” гэж Майкл шийдсэн. Иймээс үр хүүхдүүдээ харахын тулд Майкл өөрөө дүрээс татгалзахыг илүүд үзсэн юм.

“Аз жаргалтай гэр бүлд заавал байх ёстой нэг нөхцөл бол нөхөр ба эхнэр тус тусдаа усны өрөөтэй байх ёстой. Гүйцээ, цэг” хэмээн Кэтрин Зета-Жонс хэлж байжээ. Гэр бүлийн бүх гишүүнд таатай, эвтэйхэн байхаар ахуйгаа зохион байгуулах ёстой гэж алдартай хос үздэг. Тэд хамтдаа маш их цаг өнгөрөөдөг учраас бие биедээ хувийн орон зай үлдээх ямар чухлыг сайн мэддэг. Иймээс хосуудын амьдардаг бүх байшинд заавал тус тусын ванны өрөө бий. Майкл үргэлж эхнэрийнхээ “харьяаллын газар”-ыг хүндэтгэдэг ба орохын өмнө заавал хаалга тогшдог заншилтай.

Майкл Дуглас 2010 онд төвөнхний хавдартай болсон. Хавдар 4-р үедээ орсон гэх оноштой байв. Энэ бүхэн жүжигчин бүсгүйд мэдээж хүнд туссан. Дуу хоолойгоо алдах аюултай байсан Дуглас жилийн дараа илааршиж 2013 онд “Behind the Candelabra” кинонд тоглосон. Тэрээр “Эмми” болон “Алтан бөмбөрцөг” наадмаас шагнал хүртэж байхдаа эхнэртээ хязгааргүй их талархаж буйгаа ахин дахин хэлж байв. 

2011 онд Кэтринд сэтгэцийн хямралын анхны шинж тэмдэг илэрсэн. “2-р шинжийн биполяр хямрал” гэх оноштойгоор эмнэлэгт хэвтсэн байна. Хоёр жилийн дараа түүний өвчин улам үгдэрчээ. “Заримдаа эхнэрийнхээ огцом хурц аашийг тэсвэрлэх хүч хүрдэггүй” хэмээн Майкл хэлж байсан. Тухайн үед тэднийг жинхэнээсээ хоёр тийш болох нь гэж хүмүүс ярьж байлаа. Гэхдээ хосууд салалгүй харилцаагаа өнөөдрийг хүртэл үргэлжлүүлж байгаа юм.  

“Бид заримдаа хамгийн ойр дотнын хүн болох нөхөр эсвэл эхнэрээ байх л ёстой зүйл мэт хүлээн авдаг. Тэр бүү хэл өөрийн амраг ханьдаа зарцуулдгаас илүү их хүчин чармайлтыг муухан таних хүмүүст зориулах нь бий. Иймээс би “Надад ямар их аз дайрав аа. Кэтрин маань ямар сайхан, ямар ер бусын эмэгтэй билээ” хэмээн үргэлж хэлж, үүнийгээ мартахгүй, санаж байхыг хичээдэг. Би түүнийг хязгааргүй эрхэмлэж хүндэлдэг болохоо өдөр бүр харуулах гэж оролддог” хэмээн Майкл Дуглас хэлж байв.

Хүндэтгэл, орон зай, хошин шогийн мэдрэмж бол тэдний гэр бүл удаан оршин тогтнож буй тулгын гурван чулуу гэнэ. “Майкл хоол хийхдээ тааруухан ч шилдэг зоогийн газарт захиалга өгөхөд түүнтэй эн тэнцэх хүн байхгүй. Салах олон мянган шалтгаан байсан ч хамт амьдрах ганц л шалтгаан бий. Хамгийн чухал нь надад аз дайрч  би хайртайгаа учирсан. Оскарын хоёр удаагийн шагналт жүжигчин, продюсер биш. Дугласын удмын залгамжлагч ч биш. Насан туршийн маань хайр Майклтайгаа учирсан даа” хэмээн Кэтрин хэлжээ.