“Монполимет Групп”-ын ТУЗ-ийн дарга Н.Мөнхнасан өөрийн цахим хуудсандаа Монголын Эдийн засгийн форумын талаар нийтэлжээ.
Тэрээр Монголын Эдийн засгийн форум энэ жил 12 дахь удаагаа зохион байгуулагдаж байна. Хөрөнгө оруулалт татах, бизнест ээлтэй орчинг бүрдүүлнэ, хувийн хэвшлээ дэмжинэ гэсэн уриан дор энэ форумыг олон жил зохион байгуулж байгаа боловч бодит байдал дээр бизнесийн орчин хэцүүхэн хэвээр байна. Хууль тэгш бус байдлаар үйлчилж, татварын дарамт, хууль эрх зүйн орчны ялгамжтай хэрэгжилт, бүх төрлийн давхардсан төрийн байгууллагуудын шалгалтууд ар араасаа амьсгал авахуулах боломжгүй үргэлжилж байна.
Ийм орчинд жилээс жилд аж ахуй нэгжийн тоо цөөрч, ажиллах хүчний хомсдол нэмэгдэж, үндэсний үйлдвэрүүд хаалгаа барьж, импорт нь нэмэгдэж үр дүнд нь төгрөгийн ханш суларч, эдийн засаг маань улам л хараат болж байна. Уул уурхайгаас хэт хамаарсан эдийн засгаа төрөлжүүлэхгүй л бол бид эдийн засгийн дархлаагаа өдрөөс өдөрт алдаж байна.
Цаашид импортыг орлох бүтээгдэхүүн үйлдвэрлэлийг бодлогоор дэмжих, үндэсний үйлдвэрлэл явуулахад хууль эрхзүйн oрчин ядаж хоорондын уялдаа холбоотой болох хэрэгтэй байна.
Хөдөлмөрийн хууль, хөрөнгө оруулалтын тухай хууль, Татварын багц хууль зэрэг аж ахуйн нэгжүүдээ дэмжсэн хууль эрхзүйн болон татварын орчныг яаралтай бий болгох шаардлагатай байна.
Манай үндэсний компаниуд хөгжиж, өөрсдөө томоохон хөрөнгө оруулагчид болоод улс орныхоо хөгжилд хувь нэмрээ оруулаад явж байгаа компаниуд олон байгаа. Тиймээс гадна, дотно гэж ялгалгүйгээр эрх тэгш дэмжлэг хэрэгтэй гэв.
