Боловсролын сайд Н.Наранбаяр УИХ-ын гишүүн С.Ганбаатарын хүүхэд Ерөнхийлөгчийн нэрэмжит тэтгэлгээс хасагдсан тухай асуудлаар өөрийн цахим хуудсандаа нийтэлжээ.
Тэрээр: Энэ нь 2023 онд УИХ-аас баталсан Ашиг сонирхлын зөрчлөөс урьдчилан сэргийлэх тухай хуулийн заалттай холбоотой юм. Хуулийн заалт нь
“Монгол Улсын Ерөнхийлөгч, Улсын Их Хурлын гишүүн, Монгол Улсын Ерөнхий сайд, Засгийн газрын гишүүн, аймаг, нийслэлийн Засаг дарга, эсхүл түүний эхнэр, нөхөр, хамтран амьдрагч, хүүхэд төрөөс санхүүжүүлэх, хэрэгжүүлэх, хөрөнгө оруулалт, арилжааны шинжтэй төсөл, хөтөлбөр, төрөөс олгох хөнгөлөлт, баталгаа, хандив, зээл хүртэгч, эсхүл эдгээрийг гүйцэтгэж байгаа аж ахуйн нэгжийн нөлөө бүхий хувьцаа эзэмшигч, түүний эцсийн өмчлөгч, хөрөнгө эзэмшигч, хамтрагч байж болохгүй”
Тэгэхээр УИХ-ын гишүүний хүүхэд төрөөс санхүүжүүлэх тэтгэлэгт хамрагдах боломжгүй юм.
С.Ганбаатарын хүүхэд тэтгэлэгт шалгарсны дараа хууль зөрчих асуудал үүссэн нь намрын улирлын гэрээ дүгнэх үеэр тодорхой болсон учир гэрээг цуцалжээ гэв. Мөн яг үүнтэй адил тохиолдол өмнө нь УИХ-ын гишүүн Ц.Идэрбатын хүүхдэд тохиолдож гишүүн өөрийн хүсэлтээр татгалзаж байсан удаатай.
