Монгол-Узбекистаны парламентын бүлгийн дарга С.Эрдэнэбат Узбекистан Улсын парламент дахь Монгол Улсын Их хуралтай харилцах бүлгийн хамтран даргалагч Туйчиев Анвар Марзаахмедовичтай цахим уулзалт хийв

УИХ-ын гишүүн, УИХ дахь Монгол-Узбекистаны парламентын бүлгийн дарга С.Эрдэнэбат, УИХ-ын гишүүн, УИХ дахь Монгол-Узбекистаны парламентын бүлгийн дэд дарга Ц.Мөнхбат, УИХ-ын гишүүн , УИХ дахь Монгол-Узбекистаны парламентын бүлгийн гишүүн  Г.Уянгахишиг болон Монгол Улсаас Бүгд Найрамдах Узбекистан Улсад суугаа Онц бөгөөд Бүрэн эрхт Элчин сайд Д.Батбаатар нар Бүгд Найрамдах Узбекистан Улсын Олий Мажлисын Сенатын Газар тариалан, усны аж ахуй, байгаль орчны асуудал эрхэлсэн хорооны дарга, Бүгд Найрамдах Узбекистан Улсын Олий Мажлис дахь Монгол Улсын Их Хуралтай харилцах парламент хоорондын бүлгийн хамтран даргалагч Туйчиев Анвар Марзаахмедович, тус улсын Олий Мажлисын Хууль тогтоох танхимын Газар тариалан, усны аж ахуй, байгаль орчны асуудал эрхэлсэн хорооны дарга, Бүгд Найрамдах Узбекистан Улсын Олий Мажлис дахь Монгол Улсын Их Хуралтай харилцах парламент хоорондын бүлгийн хамтран  даргалагч Мамутов Равшан Аминаддинович нартай цахим уулзалтыг зохион байгууллаа.

Уулзалтын эхэнд Бүгд Найрамдах Узбекистан Улсын Олий Мажлисын Сенатын хорооны дарга, Монгол Улсын Их Хуралтай харилцах парламент хоорондын бүлгийн хамтран даргалагч Туйчиев Анвар Марзаахмедович, Сенатын танхим Үндсэн хуульдаа хэрхэн өөрчлөлт оруулж, танхимаа хэрхэн бэхжүүлсэн зэрэг үйл ажиллагааныхаа талаар танилцуулж, хоёр улсын парламент хоорондын хамтын ажиллагааг хөгжүүлэхэд хамтын ажиллагааг эрчимжүүлэх хүсэлтэй буйгаа илэрхийллээ.

Мөн Монгол Улсын Ерөнхийлөгч У.Хүрэлсүхийн 2024 оны 6 дугаар сард Бүгд Найрамдах Узбекистан Улсад хийсэн анхны төрийн айлчлал нь манай хоёр улсын найрсаг харилцааг бэхжүүлэх, харилцан ашигтай эдийн засгийн хамтын ажиллагааг өргөжүүлэхэд чухал ач холбогдолтой болсон гээд хууль тогтоох үйл ажиллагааны явц, засаглалыг хэрхэн бэхжүүлж буй Монгол Улсын туршлагыг судалж, харилцан айлчлалын давтамжийг нэмэгдүүлэх сонирхолтой байгаагаа онцолсон юм.

УИХ-ын гишүүн, УИХ дахь  Монгол-Узбекистаны парламентын бүлгийн дарга С.Эрдэнэбат, 2024 оны УИХ-ын сонгуулиар байгуулагдсан УИХ-ын үйл ажиллагааг мөн танилцуулаад эртний түүхт харилцаагаа улам бэхжүүлэн хөгжүүлэхэд парламентын түвшний харилцаа чухал үүрэг гүйцэтгэх талаар онцоллоо. Мөн тэрбээр, Монгол, Узбекистаны хооронд 1992 онд дипломат харилцаа тогтоосноос хойших 30 гаруй жилийн хугацаанд харилцаа, хамтын ажиллагаа тогтвортой хөгжиж байна. Манай хоёр улсын парламент хамтын ажиллагаагаа бэхжүүлэхэд  харилцан туршлага судлах, хамтын ажиллагааны хэтийн төлөвийг тодорхойлж ажиллах нь зүйтэй гэв хэмээн УИХ-ын Хэвлэл мэдээллийн газраас мэдээллээ.