Монголын жүдогийн шигшээ багийн тамирчин, 24 настай Кадирбекын Ёолк 2025 оны жүдо бөхийн Дэлхийн аварга шалгаруулах тэмцээний эрэгтэйчүүдийн 60 кг-ийн жинд анх удаа оролцож, гайхалтай барилдаанаар хүрэл медаль хүртлээ. Түүний энэ амжилт нь Монголын жүдо бөхийн спортын 30 дахь, харин дэлхийн аваргын 19 дэх хүрэл медаль болж байна.
Ёолк нэмэлт цагт Бразилийн жүдоч Мишел Аугусто-г ялснаар медалийн болзол хангаж, Монгол түмний омог бахархал, спортын түүхэнд шинэ хуудас нээлээ. Тэрээр гэмтэлтэй өрсөлдөгчөө үүрч дэвжээнээс буусан нь тамирчин хүний ёс зүй, спортын сэтгэлгээний гайхамшигтай жишээ болж, олон хүний сэтгэлийг хөдөлгөсөн.
Түүний анхны багш бол Дархан-Уул аймгийн дасгалжуулагч СМ Д.Балжинням бөгөөд 2009 оноос хойш сэтгэл зүтгэлээр шавь нараа бэлтгэж иржээ. Амжилтаар жигүүрлэсэн залуу аваргаа нутгийн зон олон нь баярын хүндэтгэлтэйгээр угтан авч, бахархлаа илэрхийлэв.
Шагналыг Монголын Жүдо бөхийн холбооны ерөнхийлөгч, Монгол Улсын Ерөнхийлөгч асан Х.Баттулга өөрийн гараар гардуулсан нь энэ мөчийг улам онцгой болгосон юм.
Сэтгэгдэл (0)
Сэтгэгдэл бичигдээгүй байна