УИХ-ын гишүүн Ч.Лодойсамбуу өнөөдөр 20 цагт Ерөнхий сайдыг томилох чуулганы талаар байр сууриа илэрхийлж сэтгүүлчдэд мэдээлэл өглөө.
Тэрээр: Чуулганы нэгдсэн хуралдаан 20 цагт эхлэх юм бол шийдвэр нь ажлын бус өдөр гарах болохоор гарсан шийдвэр нь хүчинтэй байх уу гэдэг асуудал гарч ирнэ. Тийм учраас манай бүлэг ажлын өдөр хэлэлцэхгүй бол болохгүй гэдэг санал оруулна. Удирдах зөвлөл дээр олонхын саналаар саналыг зөвшөөрвөл хуралдааны тов хойшлогдоно. Өнөөдөр товлогдсон тов дараалал өөрчлөгдөхгүй бол АН-ын бүлэг хуралдаад шийдвэрээ гаргана. Дөрвөн цаг хуралдаад дуусахгүй нь ойлгомжтой тийм учраас АН-ын бүлэг хуулийн зөрчил руу орохгүйн тулд ажиллана. Дэгийн тухай хуульд ажлын өдөр хуралдана гээд заачихсан гэтэл 00 цаг гээд ажлын өдөр дуусчихна тэгээд амралтын өдөр болчих учраас яах вэ гэдэг саналыг оруулна. Сэтгүүлч байсны хувьд та нар унтаж бай бид нар юмаа ярья мөн та нар анхаараад байна уу хаалттай хурал хийчихье гэж болохгүй гэдэг байр суурийг илэрхийлж байна. Энэ хурал шинэ гишүүдэд бол анхааруулах дохио шиг санагдаж байна. Ерөнхий сайдын томилгоог хурдан хийх биш ул суурьтай хандаж оновчтой сонгох хэрэгтэй. Нэг хүний асуудал биш Монгол Улсын ардчилал, улс орны ирээдүйтэй холбоотой асуудал учраас ултай суурьтай хандах хэрэгтэй гэв.
