УИХ-ын даргын 115 дугаар захирамжаар байгуулагдсан Иргэний хуулийн хэрэгжилттэй танилцаж, санал, дүгнэлт гаргах үүрэг бүхий Ажлын хэсгийн ахлагч, УИХ-ын гишүүн О.Номинчимэг, УИХ-ын гишүүн Х.Баасанжаргал нар Японы олон улсын хамтын ажиллагааны байгууллага /ЖАЙКА/-ын Хууль, эрх зүйн хэлтсийн зөвлөх Моринага Таро тэргүүтэй төлөөлөгчдийг өнөөдөр /2025.06.10/ хүлээн авч уулзлаа.
Уулзалтын үеэр УИХ-ын гишүүн О.Номинчимэг, 2002 онд Иргэний хуулийг баталснаас хойш 20 гаруй жилийн хугацаанд хуульд бүхэлд нь үнэлгээ хийсэн тохиолдол байхгүй. Ийм учраас 2024 онд УИХ-ын дарга захирамж гарган Иргэний хуулийн хэрэгжилттэй танилцаж, санал дүгнэлт боловсруулах үүрэг бий ажлын хэсгийг УИХ-ын хуульч гишүүдийн бүрэлдэхүүнтэй байгуулсан. Ажлын хэсэг Иргэний хуулийн зохицуулалт, агуулгын хүрээнд үнэлгээ, судалгаа хийх багийг иргэний эрх зүйн судлаач эрдэмтэд, Засгийн газрын төлөөлөл, төрийн байгууллагын албан хаагчдыг оролцуулан байгуулж, Иргэний хуулийн нийт зохицуулалтын 30 орчим хувьд үнэлгээ хийгээд байна.
Энэхүү үнэлгээний үр дүнг бид Хууль зүйн байнгын хороонд танилцуулж, эрдэм шинжилгээний хурал хийж, хэлэлцүүлэг өрнүүлэхээр төлөвлөн ажиллаж байна. Ингэснээр Иргэний хуулийн зарим зохицуулалтад нэмэлт, өөрчлөлт оруулах эсэх асуудал илүү тодорхой болж, хуулийн төсөл боловсруулах тухай асуудал хөндөгдөх юм. Иймд хууль, эрх зүйн орчныг сайжруулах хүрээнд Японы талтай судалгаа, шинжилгээний чиглэлээр туршлага солилцож, хамтран ажиллах хүсэлтэй байна гэлээ.
Японы олон улсын хамтын ажиллагааны байгууллагын Хууль, эрх зүйн хэлтсийн зөвлөх Моринага Таро, Япон Улс Монгол Улстай хууль, эрх зүйн орчны шинэчлэлийн хүрээнд хамтарч ажилласан туршлага бий. Зургаан жилийн өмнө Арилжааны хуулийн төсөлтэй холбоотой судалгаанд оролцож байсан туршлагатай хэмээгээд хамтран ажиллах боломжийн талаар санал солилцлоо хэмээн Улсын Их Хурлын Хэвлэл мэдээллийн газраас мэдээллээ.
